თბილისის საქალაქო სასამართლოში ე.წ. პიჯაკების საქმის განხილვა მიმდინარეობს. საუბარია, საქართველოს ყოფილი პრეზიდენტის, მიხეილ სააკაშვილისა და სახელმწიფო დაცვის სპეციალური სამსახურის ყოფილი უფროსის, თემურ ჯანაშიას მიერ სახელმწიფო ბიუჯეტის კუთვნილი დიდი ოდენობით თანხის გაფლანგვის საქმეზე.
დღევანდელ სხდომაზე ფინანსთა სამინისტროს წარმომადგენელი იკითხება. სააკაშვილისა და ჯანაშიას ადვოკატებმა აღნიშნულ საქმეზე მირზა სუბელიანის დაკითხვა მოითხოვეს. ადვოკატების განცხადებით, ბოლო დროს გავრცელებული ჩანაწერები საქმეს უნდა დაერთოს.
როგორც ადვოკატები აცხადებენ, სუბელიანი ჩანაწერში ბევრ გახმაურებულ საქმეზე საუბრობს და ამბობს, რომ პროკურატურას სხვადასხვა საქმეზე მტკიცებულებების მოპოვებაში ეხმარებოდა.
მოსამართლე ბადრი კოჭლამაზიშვილმა ადვოკატების შუამდგომლობა მოთხოვნის უსაფუძვლობის გამო არ დააკმაყოფილა.
ცნობისთვის, მიხეილ სააკაშვილსა და თეიმურაზ ჯანაშიას ბრალად სამსახურებრივი მდგომარეობის გამოყენებით საბიუჯეტო თანხების დიდი ოდენობით ჯგუფურად გაფლანგვა ედებათ ბრალად. საუბარია, 9 მილიონ ლარზე.
