ბიჭი, ორი და სამასი...
ცისფერი - ჩემი რჩეული ფერთა პალიტრიდან... ფერი, რომელიც ჩემი პირველი ბიჭისთვის შევარჩიე... საოცარი მოლოდინი მქონდა. მეორე ფეხმძიმობას მეტი გააზრებით და პასუხისმგებლობით მოვეკიდე. კვება დავარეგულირე, თავს ძალა დავატანე, ჩემს გოგონას პატარა ძამიკოს სიყვარული ვერბალურად ჩავუნერგე, საგულდაგულოდ შევარჩიე პაწაწუნა ტანსაცმელი და დავგეგმე მისი ქვეყნად მოვლინების ზეიმი.. მაგრამ ენერგია, რომელიც 28 კვირა მავსებდა, მოულოდნელად სადღაც გაქრა - გონება დავკარგე... მერე ცოტა რამ თუ მახსოვს: საავადმყოფოს თეთრი კედლები, ექიმები, ექთნები, პროფესიული ფუსფუსი და ჩურჩული: შეიძლება ბავშვი ვერ გადარჩეს. ამ სიტყვებით გამოწვეული ჟრუანტელი დღემდე თან მდევს. არასდროს დამავიწყდება შიშის ხანგრძლივი ემოცია... მაგრამ ვთვლი, დედის ორგანიზმმა შვილისთვის ბრძოლა დაიწყო: ჩემი მათე 35 კვირის დაიბადა, 2 კილოგრამი და 300 გრამი. ხელში ვერ ავიყვანე. მისი ნახვის უფლება მხოლოდ მეორე დღეს მომცეს. მტკივნეული იყო, მაგრამ მესმოდა, რომ - აუცილებელიც. მისი დაკარგვის შიში ხომ დაუსრულებლად მეჩვენებოდა. დღეს ჩემი ბიჭი სრულიად ჯანმრთელია, რაც ჩემი არსებობის საუკეთესო გამართლებაა.
ნიკოლოზ ვაშაყმაძე, დასავლეთ საქართველოს გულის ცენტრის ხელმძღვანელი
15 ივლისის გვიან ღამეს ოზურგეთის კლინიკიდან შეტყობინება შემოვიდა. 27 კვირის ორსული ქალი მძიმე სუნთქვის უკმარისობით დასავლეთ საქართველოს სამედიცინო ცენტრში გადმოყვანას და სპეციალიზირებულ მკურნალობას საჭიროებდა. ჩვენს კლინიკაში შემოსვლისას მისი მდგომარეობა საკმაოდ მძიმე იყო. ექოსკოპიურად დადგინდა გულის ერთ-ერთი სარქვლის მძიმე კომბინირებული დაზიანება, რაც ფილტვებში სისხლის შეგუბებას და შეშუპებას იწვევდა. ხელოვნურ ვენტილაციაზე გადასვლა რეგულარული არაინვაზიური სუნთქვითი თერაპიით (CPAP ნიღბით) იქნა თავიდან აცილებული. გულმკერდში სითხის დაგროვების გამო საჭირო გახდა თანმიმდევრულად ორივე მხრიდან სითხის ამოღება. მდგომარეობა მნიშვნელოვნად სტაბილური გახდა, თუმცა პროგრესირებადი ორსულობის ფონზე გაცილებით მეტი სირთულე იყო მოსალოდნელი.
მოგეხსენებათ, ფეხმძიმობა სერიოზული გამოწვევაა გულსისხლძარღვთა სისტემის ფუნქციონირებისთვის. ორსულობისას მატულობს პერიფერული არტერიების რეზისტენტობა, ტონუსი, 27 კვირის ორსულობის შემდეგ გულის კუმშვადობა 10-15 დარტყმით მეტი ხდება წუთში. ასევე, მატულობს გულის დარტყმითი მოცულობა 10 მლ-ით თითოეულ შეკუმშვაზე, რასაც, საბოლოო ჯამში, გულის წუთმოცულობის (ანუ დატვირთვის) 30-50%-ით ზრდამდე მივყავართ.
ძნელი წარმოსადგენი იყო, რომ მეგის გული ამ დატვირთვას გაუძლებდა. არსებობდა ნაყოფის განვითარების შეფერხების, ჰიპოტროფიის, ადრეული მშობიარობის და დაბადების შემდგომ ინტენსიური თერაპიის აუცილებლობის საშიშროებები. განიხილებოდა ორსულობის შეწყვეტა, რომელიც ყველა მხარისთვის, ერთი შეხედვით, „მშვიდობიანი გადაწყვეტილება” იქნებოდა, თუმცა ამ გადაწყვეტილებას პატარა მათეს სიცოცხლე შეეწირებოდა.
კარდიოქირურგიული ინტენსიურის უფროსი ექიმის, თენგიზ ფურცხვანიძის, დედათა და ბავშვთა ჯანმრთელობის განყოფილების ხელმძღვანელის, ოლეგ სინაურიძის, მეგის მკურნალი ექიმის, სამეანო სამსახურის უფროსის, ლევან ჯავახაძისა და მთელი კარდიოქირურგიული და მეან-გინეკოლოგიური სამსახურის კოორდინირებულმა მუშაობამ შეუძლებელი შესაძლებელი გახადა: 29 აგვისტოს პატარა მათე მოევლინა ქვეყანას, ჯანმრთელი.
მათეს დაბადება ჩვენი, როგორც მულტიპროფილური კლინიკის წარმატების სიმბოლოა.
მეგის კი წინ გულის ოპერაცია ელოდება და მედიკამენტოზურ მკურნალობას განაგრძობს.
ლევან ჯავახაძე, დასავლეთ საქართველოს სამედიცინო ცენტრის სამეანო სამსახურის ხელმძღვანელი
ახალგაზრდა ქალი ჩვენს კლინიკაში გულის უკმარისობით შემოიყვანეს. მისი მდგომარეობა გინეკოლოგიური განხრითაც საკმაოდ მძიმე იყო. თავდაპირველად, მიმდინარეობდა მსჯელობა ნაყოფის შენარჩუნების შესაძლებლობაზე, შემდეგ კი მისი ორსულობის გაგრძელებისა და მართვის გადაწყვეტილება მივიღეთ. პაციენტი ორსულობის 35-ე კვირამდე კარდიოქირურგიული გუნდისა და გინეკოლოგების მკაცრი მონიტორინგის ქვეშ იყო. პარალელურად, დავიწყეთ ნაყოფის მომზადებაც. საკეისრო კვეთა კარდიოქირურგიის საოპერაციო ბლოკში ჩატარდა, რაც ისტორიული ფაქტია ქუთაისის კარდიოქირურგიის ისტორიაში. დედამ პროცესი გართულებების გარეშე გადაიტანა და თავს კარგად გრძნობს. თამამად შემიძლია ვთქვა, რომ ჩვენი პაციენტის გამოჯანმრთელება და ახალი სიცოცხლის მოვლენა გუნდური მუშაობის შედეგია.
