სამწუხაროდ, არ იცვლება რუსული მიდგომა. ეს არის არა პრაგმატული, არამედ აგრესიული პოლიტიკა, - ამის შესახებ პარლამენტის თავმჯდომარე ირაკლი კობახიძემ მუხათგვერდის ძმათა სასაფლაოზე, საქართველო-რუსეთის ომში დაღუპულ გმირთა მემორიალის ყვავილებით შემკობის შემდეგ, ჟურნალისტებს განუცხადა.
მან მადლობა გადაუხადა ტერიტორიული მთლიანობისათვის მებრძოლებს.
„დღეს შესრულდა 10 წელი რუსეთ-საქართველოს ომის დაწყებიდან. აგვისტოს დღეებმა ჩვენ ძალიან დიდი ტკივილი და მძიმე მოგონებები დაგვიტოვა ომისა და ადამიანური ტრაგედიების შესახებ; დაგვიტოვა დაკარგული ტერიტორიები, თუმცა ასევე დაგვიტოვა სიამაყის განცდა და ეს განცდა პირველ რიგში, დაკავშირებულია ჩვენს გმირებთან, რომლებსაც დღეს პატივს მივაგებთ. ჩვენ მადლობა უნდა გადავუხადოთ ჩვენს სამხედროებს, მოხალისეებს, თითოეულ იმ ადამიანს, რომელიც 10 წლის წინ ჩვენი ქვეყნის დამოუკიდებლობის დასაცავად გულანთებული იდგა.
სამწუხაროდ, არ იცვლება რუსული მიდგომა. ეს არის არა პრაგმატული, არამედ აგრესიული პოლიტიკა. ჩვენ გვაქვს რა თქმა უნდა, ჩვენი ხედვა, რომელიც მდგომარეობს იმაში, რომ ჩვენი გმირების წინაშე მოვიხადოთ ვალი, ყველა ღონე ვიხმაროთ იმისათვის, რომ ვიბრძოლოთ ჩვენი ქვეყნის დამოუკიდებლობისა და ტერიტორიული მთლიანობის აღსადგენად,“- განაცხადა ირაკლი კობახიძემ.