ჩემდამი კითხვების არ არსებობა და მათი სიმწირე მიანიშნებს იმას, რომ არც არასდროს ყოფილა რეალური კითხვები და ის დიდი შეურაცხყოფა თუ, პოლიტიკურად ანგაჟირებული განცხადებები - „გადადექი, შენი ბრალია ყველაფერი“ - ცარიელი წყალი იყო, - ასე შეაფასა იუსტიციის მინისტრმა, თეა წულუკიანმა ხორავას ქუჩაზე მომხდარი მკვლელობის საქმეზე შექმნილი დროებითი საგამოძიებო კომისიის მიერ მისადმი კითხვების სიმწირე. 
წულუკიანმა კომისიის სხდომათა დარბაზში სულ რაღაც 5 წუთი დაჰყო.   
„ღია ეთერში გადაიცა და ყველამ ნახა, რომ პრაქტიკულად ორი თუ სამი კითხვა იყო, ვეთანხმები თუ არა კვლავ იმას, რომ ირაკლი შოთაძე არ უნდა გადამდგარიყო და მე ვუპასუხე, რომ დიახ, ვეთანხმები დღესაც, რომ ის არ უნდა გადამდგარიყო. მეტი კითხვა არ დასმულა, რაც ჩემთვის გასაოცარია. იმედი მაქვს, რომ ეს არ მიანიშნებს იმაზე, რომ კომისიას სურვილი არ აქვს სიღრმისეულად განიხილოს თუ რა როლი აქვს სისხლის სამართლის რეფორმებში იუსტიციის მინისტრს და სამინისტროს. ამას ალბათ, იმით ავხსნიდი, რომ კომისიის ზოგიერთ წევრს, რომელიც უმრავლესობაშია, არ სურდა ჩემგან მოესმინა ის ძალიან დიდი პოზიტივი სისხლის  სამართლის რეფორმებზე, რაც ჩვენ 6 წლის მანძილზე გავატარეთ“, - განაცხადა წულუკიანმა. 
როგორც ის განმარტავს, სხდომაზე სტატისტიკით მივიდა და სურდა სისხლის სამართლის საქმეში განხორციელებულ რეფორმებზე ესაუბრა, თუმცა, ამასთან დაკავშირებით არავინ დაინტერესებულა. 
„მე სტატისტიკით მოვედი, მინდოდა მეთქვა, რადგან ბავშვთან სისხლის სამართლის საქმეს ეხება საქმე, რომ ჩვენ ძალიან დიდი რეფორმა გავატარეთ. ბავშვთა მართლმსაჯულების კოდექსი შემოვიღეთ, ამან გამოიწვია ის, რომ 2011 წელს 190 პატარა ბავშვი იყო მაშინდელ ციხეში, დღეს კი, 32 არასრულწლოვანია მხოლოდ, მათი უფლებებია დაცული. მინდა ხმამაღლა გითხრათ, ის ფაქტი, რომ დღეს ეს საგამოძიებო კომისია არსებობს და მუშაობს, იმას ნიშნავს, რომ ჩემ მიერ, სამინისტროს და მთავრობის მიერ გატარებულმა რეფორმებმა მოიტანა ის,რომ ვერავინ, მტკიცებულებების გარეშე ბავშვებს ციხეში ვერ ყრის. ამას ჩვენს ბავშვებს ვულოცავ, რომელთაც ციხეში ვერავინ აგდებს, თუ მტკიცებულებები არ იქნება“, - განაცხადა წულუკიანმა. 
მან ხორავას ქუჩაზე მოკლული მოზარდების მშობლებს კიდევ ერთხელ მიუსამძიმრა ტრაგედია და განაცხადა, რომ გამოძიება ყველა გარემოების დასადგენად პირველივე დღიდან მუშაობს. 
„კიდევ ერთხელ ვუსამძიმრებ დადუნაშვილის დედ-მამას, სარალიძის დედას, რომელიც თითქმის არასდროს ჩნდება და არც კი წარმოგვიდგენია მისი ტკივილი, ასევე სარალიძის მამას. მათ მინდა ვუთხრა, რომ პროკურატურა, სასამართლო, გამოძიება ბოლომდე სიმართლის მხარეზე იყო. ეს არის უპრეცედენტო შემთხვევა, როცა საგამოძიებო კომისიას პოლიტიკოსები იმისთვის ქმნიან, რომ სასამართლოში მიმდინარე დავაზე იმსჯელონ, ვფიქრობ, აღრეულია ცნებები, აღრეულია ხელისუფლებებს შორის ბალანსი და ურთიერთდამოკიდებულება. ეს ყველაფერი დასანანია, მაგრამ ამის მიუხედავად, დღეს მოვედი და ჩემთვის ორი აბსოლუტურად უცნაური შეკითხვა მოვისმინე. 
არ ველოდი, რომ სულ 5 წუთი დავყოფდი დარბაზში დროს, რადგანაც მეგონა ვისაუბრებდით მაგალითად, იმაზე, რომ 2017 წელს მსოფლიოს 120 ქვეყანას შორის საქართველო კანონიერების და კანონის უზენაესობის რიგებში 38-ე იყო, რომ პირველია, აღმოსავლეთ ევროპის და ცენტრალური აზიის ქვეყნებში დემოკრატიის ხარისხის და კანონის უზენაესობის მხრივ“, -დასძინა წულუკიანმა.