„ჩემს წინ არავინ გარდაცვლილა. არ ვიცი, იქ ბევრი ბავშვი იყო და ვინ რა გააკეთა, მართლა არ დამინახავს,“ - ამის შესახებ „ხორავას ქუჩის“ საქმეზე შექმნილი პარლამენტის საგამძიებო კომისიაში გამოკითხვაზე მყოფმა ავტომობილის მძღოლმა, ნიკოლოზ იორდანაშვილმა, განაცხადა.
ნიკოლოზ იორდანაშვილი შემთხვევის დროს ხორავას ქუჩაზე იმ ეზოში იმყოფებოდა, სადაც მკვლელობა მოხდა. დღეს კომისიაზე მისი გამოკითხვა მიმდინარეობს და კომისიის წევრები მისგან ინფორმაციის მიღებას ცდილობენ, რადგან შემთხვევას ის ძალიან ახლოდა, სულ რამდენიმე მეტრში უყურებდა. თუმცა, ყველა კითხვის პასუხად აცხადებს, რომ მას არაფერი დაუნახავს. კომისიის მდივანმა, ოთარ კახიძემ, ნიკოლოზ იორდანაშვილს შეახსენა სისხლის სამართლის კოდექსის ის მუხლი, რაც ცრუ ჩვენების მიცემას ეხება.
„ცრუ ჩვენება სისხლის სამართლის წესით ისჯება. თქვენ სასამართლოზეც გაქვთ მიცემული ჩვენება და თქვით, რომ არაფერი დაგინახავთ. თუ პროკურატურა მიიჩნევს, რომ ეს სიცრუეა, მაშინ ისჯება 2-დან 6 წლამდე ვადით თავისუფლების აღკვეთით. ხელში ტელეფონი გეჭირათ და პოლიციაში რატომ არ დარეკეთ? სხვამ საერთოდ როგორ მოგასწროთ ან დარეკვა ან დაყვირება? თქვენ რასაც ყვებით, არ გეგონოთ, რომ ყველაფერი გვჯერა. ამას ჩვენ შემდგომ შევაფასებთ. ეს უბრალო ჩხუბი არ იყო. ერთ მოზარდს ორჯერ დაარტყეს დანა, მეორეს 12-ჯერ. ამიტომ უბრალო ჩხუბი არ ყოფილა,“ - განაცხადა ოთარ კახიძემ.
„პოლიციაში არ დამირეკავს. ჩხუბი რომ დაიწყო, მაშინვე ყვიროდნენ, რომ პოლიციაში დარეკილიაო. მე არ დავკვირვებივარ არაფერს. რა გავაკეთე, ვერ დავიმახსოვრე. მე არაფერს ვმალავ. სახეზე რომ მახსოვდეს აუცილებლად ვიტყოდი. ჩემს წინ არავინ გარდაცვლილა. არ ვიცი. იქ ბევრი ბავშვი იყო და ვინ რა გააკეთა, მართლა არ დამინახავს. ხმალი ხო არაა, რომ დამენახა?“ - განაცხადა ნიკოლოზ იორდანაშვილმა.
