ხორავას ქუჩაზე მოკლული დავით სარალიძის მამა, ზაზა სარალიძე არ გამორიცხავს, რომ შაბათს, საქალაქო სასამართლოში მომხდარ ინციდენტთან დაკავშირებით, გამოკითხვაზე დაიბარონ.
"გამორიცხული არაა რომ მეც დამიბარონ. მზად ვარ გავცე ის ინფორმაცია, რა ინფორმაციასაც ვფლობ. არავის არ დავაფარებ ხელს, იმის და მიუხედავად, ჩემთვის ახლობელი იქნება, თუ უცხო იქნება. სამართლის წინაშე ყველა ვაგებთ პასუხს", - აცხადებს სარალიძე.
ის მზადყოფნას გამოთქვამს, შეხვდეს ნებისმიერ ადამიანს, ვინც სიმართლის დადგენაში დაეხმარება.
"მზად ვარ ნებისმიერ ადამიანს შევხვდე. ჩემთვის მნიშვნელობა არ აქვს ის მმართველი გუნდიდან იქნება, სხვა პოლიტიკური პარტიიდან, თუ უბრალო საქართველოს მოქალაქე იქნება, ოღონდ რა თქმა უნდა ჩემს უფლებადამცველებთან ერთად, ქალბატონ ნესტან ლონდარიძესთან და ზვიად კუპრავასთან ერთად", - აღნიშნავს სარალიძე.