„ჩემი დაცვის ქვეშ მყოფს, არც ერთი პირის მკვლელობაში არ მიუღია მონაწილეობა და ამიტომაც ვერ წარმოადგინეს დასკვნა, რომელიც საპირისპიროს დაადასტურებდა. ჩემი დაცვის ქვეშ მყოფს არც ერთი პირისთვის დანა არ დაურტყამს“, - განაცხადა ჟურნალისტებთან, ხორავას ქუჩაზე მოზარდებს შორის მომხდარი მკვლელობის საქმეზე ერთ-ერთი ბრალდებულის ადვოკატმა, ინგა შარაშენიძემ.
როგორც ის განმარტავს, მისი დაცვის ქვეშ მყოფს, რომელსაც ორი მოზარდის, ლევან დადუნაშვილის და დავით სარალიძის მკვლელობაში ედება ბრალი, მუხლი უნდა გადაუკვალიფიცირდეს.
„ექსპერტიზის დასკვნით დგინდება, რომ ექსპერტს არ შეუძლია უპასუხოს იმ კითხვას, რასაც ედავებიან ჩემი დაცვის ქვეშ მყოფს. აქედან გამომდინარე, საბოლოოდ, მე ველოდები მუხლის გადაკვალიფიცირებას ან გამამართლებელ განაჩეს. ეს უკვე მოსამართლეზეა დამოკიდებული. დაახლოებით ორი კვირის ვადაში წარვადგენ ალტერნარტიული ექსპერტიზის დასკვნას, რომელიც ყველა კითხვას გასცემს პასუხს. ჩემი დაცვის ქვეშ მყოფი ორივე დანაშაულის ჩადენის ეპიზოდში, რასაც მას ედავებიან, უდანაშაულოა. მე ამას ექსპერტიზებით და სხვა მტკიცებულებებით დავადასტურებ.
ჩემი დაცვის ქვეშ მყოფს ედავება ბრალდების მხარე ორივე პირის მკვლელობას. პროკურატურამ ამით თქვა, რომ ორმა ბრალდებულმა ჩაიდინა ორი პირის სასტიკი მკვლელობა და სხვები არც გარჩევაში, არც რაიმე სხვა ქმედებაში არ მონაწილეობდნენ, რაც არ შეესაბამება რეალობას“, - აცხადებს შარაშენიძე.