ისინი, რა თქმა უნდა, იმუქრებოდნენ, იგინებოდნენ, ილანძღებოდნენ, იფურთხებოდნენ, მანქანას ურტყამდნენ ძალიან ძლიერად, ახტნენ კაპოტზე. წინ ამიტომაც არის თამთას მანქანა დაზიანებული. ურტყამდნენ ძალიან ძლიერად შუშას. იმუქრებოდნენ, რომ გადმოგვათრევდნენ, გვცემდნენ და ა.შ, - ამის შესახებ "რუსთავი 2"-ის ჟურნალისტმა გიორგი გაბუნიამ განაცხადა.
როგორც ის იხსენებს, როდესაც ლადო სადღობელაშვილმა მანქანაში დაინახა, სხვებს დაუძახა და უთხრა, რომ მანქანისთვის ალყა შემოერტყათ.
„ჩვენ რომ ავდიოდით, მეორე მანქანა მოდიოდა, რომელსაც გზა დავუთმეთ და აღმოჩნდა, რომ ამ მანქანაში იჯდა სწორედ სადღობელაშვილი, რომელიც მოდიოდა და უნდა მიეღო მონაწილეობა აქციაში. მან დამინახა მე, გააჩერა მანქანა. მითხრა, რომ მე ზუსტად შენთან მოვდივარ, სად მიდიხარო. გადმოვიდა მანქანიდან, დაუძახა დანარჩენებს, რომლებიც, როგორც უკვე გითხარით, შეკრებილები იყვნენ ჭიშკართან. უთხრა, რომ ალყა შემოერტყათ მანქანისთვის. ეს არ იყო, რომ უბრალოდ ალყაშემორტყმულ ვიყავით და უბრალოდ ადგილიდან დაძვრის საშუალებას არ გვაძლევდნენ. არა, ისინი, რა თქმა უნდა, იმუქრებოდნენ, იგინებოდნენ, ილანძღებოდნენ, იფურთხებოდნენ, მანქანას ურტყამდნენ ძალიან ძლიერად, ახტნენ კაპოტზე. წინ ამიტომაც არის თამთას მანქანა დაზიანებული. ურტყამდნენ ძალიან ძლიერად შუშას. იმუქრებოდნენ, რომ გადმოგვათრევდნენ, გვცემდნენ და ა.შ.“ - განაცხადა გიორგი გაბუნიამ.
მისივე თქმით, მანქანის კარი ჩაკეტილი რომ არ ყოფილიყო, მას აუცილებლად ფიზიკურად გაუსწორდებოდნენ.
ცნობისთვის, ტელეკომპანია „რუსთავი-2“-თან გუშინ დაპირისპირება მოხდა. მომხდარი დაპირისპირების დროს პოლიციამ 6 პირი დააკავა.
შეგახსენებთ, ე.წ. ქართული მარშის წევრები გუშინ "რუსთავი 2" -ის ოფისსა და ჟურნალისტებს თავს დაესხნენ. მათ ტელეწამყვან გიორგი გაბუნიას და ტელეკომპანიის იურისტს თავისუფლება უკანონოდ აღუკვეთეს.
ასევე, ფიზიკური შეურაცხყოფა მიაყენეს ტელეკომპანიის ჟურნალისტებს.