“ქართული ოცნების” მიერ დაანონსებული საპენსიო რეფორმა მხოლოდ დღევანდელი პენსიონერების მოტყუებას ისახავს მიზნად", - ასე აფასებს “ევროპული საქართველოს” წევრი, ზურაბ ჭიაბერაშვილი იმ საკანონმდებლო პაკეტს, რომლის განხილვასაც პარლამენტი საგაზაფხულო სესიაზე იწყებს.
"ევროპული საქართველოს" აზრით, საპენსიო რეფორმა გაუთვლელი და არარეალისტურია.
"ფინანსთა მინისტრმა უნდა წარმოგვიდგინოს დეტალური ანალიზი, რას ეყრდნობა მთავრობის რეფორმა. საკანონდებლო პაკეტს არანაირი დასაბუთება თან არ ახლავს. დღევანდელ პენსიონერებს, რომლებსაც უკვე მესამე წელია, არ ეზრდებათ პენსია, არსებული რეფორმა არაფერს აძლევს. დასაქმებული მოსახლეობის უდიდესი ნაწილისთვის კი, 25, 35 და თუნდაც 45 წლის განმავლობაში განსახორციელებელი შენატანის მიუხედავად, საპენსიო რეფორმა ვერ უზრუნველყოფს ე.წ. “ღირსეულ პენსიას“.
საპენსიო რეფორმა ზრდის საგადასახადო წნეხს ბიზნესზე, რაც შეაფერხებს ეკონომიკურ ზრდას და გაზრდის უმუშევრობას, განსაკუთრებით ახალგაზრდებში, სადაც უმუშევრობის დონე ისედაც მაღალია, სხვა ასაკობრივ ჯგუფებთან შედარებით.
განსაკუთრებით მძიმე ტვირთად საპენსიო გადასახადი მცირე და საშუალო ბიზნესს დააწვება, რომელსაც არსებული ეკონომიკური სტაგნაციის პირობებში, ისედაც ძალიან უჭირს", - აცხადებს ჭიაბერაშვილი.