სხდომაზე ვიჯექი ჩვეულებრივად, დაახლოებით ერთი საათი, - ასე გამოეხმაურა რეგიონული განვითარებისა და ინფრასტრუქტურის მინისტრი ზურაბ ალავიძე პარლამენტის აგრარულ საკითხთა კომიტეტის თავმჯდომარე ოთარ დანელიას კრიტიკას, რომელმაც განაცხადა, რომ შემაშფოთებელია, როცა რეგიონული განვითარებისა და ინფრასტრუქტურის მინისტრი დაწყებიდან რამდენიმე წუთში ტოვებს აზიური ფაროსანას წინააღმდეგ ბრძოლისთვის შექმნილი სამთავრობო კომისიის სხდომას.
ალავიძის განცხადებით, მისთვის გაუგებარია, რატომ გააკეთა დანელიამ ასეთი განცხადება.
„თუ ასეთი განცხადება გააკეთა, ჩემთვის გაუგებარია რატომ გააკეთა. სხდომაზე ვიჯექი ჩვეულებრივად, დაახლოებით ერთი საათი. ფაროსანას წინააღმდეგ ბრძოლაში მობილიზებულები ვართ თავიდან ბოლომდე, მთელი ქვეყნის მასშტაბით. მაქსიმუმს გავაკეთებთ, რომ ეს ჭირი დავამარცხოთ. ყოველ შემთხვევაში, წელს დიდი რაოდენობით შევამსუბუქოთ ის დაწოლა, რაც ფაროსანაზე გვაქვს. ერთ წელში ამის მთლიანად მოგვარება ძალიან რთული იქნება“, - განაცხადა ალავიძემ.
ცნობისთვის, დღეს ოთარ დანელიამ განაცხადა, რომ არასათანადოდ არის აღქმული ის პრობლემა, რომელიც მიმდინარე წელს, აზიური ფაროსანამ გამო ქვეყანას ექნება.