„პირდაპირ შემიძლია გითხრათ, რომ საქართველოში სასამართლო არ არსებობს. მართლმსაჯულება საქართველოში არ არსებობს„ - განუცხადა ჟურნალისტებს დეკანოზ გიორგი მამალაძის საქმეზე პროცესის დასრულების შემდეგ ადვოკატმა მიხეილ რამიშვილმა.
მისი შეფასებით, სააპელაციო სასამართლოს დღევანელი გადაწყვეტილება იმ შეკვეთის და დავალების გაგრძელებაა, რომელიც პროკურატურიდან მოდიოდა და რომლის შესრულებაც პირველი ინსტანციის მოსამართლემ ბესიკ ბუგიანიშვილმა დაიწყო.
„იგივე კოპირება გაუკეთა სააპელაციო სასამართლოლმ პირველი ინსტანციის გადაწყვეტილებას. ჩვენ ერთადერთი გზა გვრჩება, რომ ევროპის ადამიანის უფლებათა დაცვის სასამართლოს მივმართოთ და დავანახოთ თუ როგორი სიბინძურეა მართლმსაჯულების მხრივ აქ. ქვეყანაში არ არსებობს დამოუკიდებელი სამართლიანი მოსამართლეები. სასამართლო არ არსებობს და
არავის არ ჰქონდეს იმედი, რომ თუ პირადი ინტერესი არ არსებობს, საქართველოში მიაღწევს სამართლიანობას. ეს არის ნიშანი ხელისუფლებიდან, მართლმსაჯულებიდან, პროკურატურიდან, რომ ვისაც კი ინტერესი ექნება ჩვენი ხელისუფლების საწინააღმდეგოდ, ყოველთვის მოარგებენ იმ გადაწყვეტილებას, რა გადაწყვეტილებითაც შეიძლება საზოგადოებაში იყოს შიში, რომ არ არსებობს ჩვენთან სასამართლო. დროა ხალხმა გადავწყვიტოთ ვინ არის მტყუანი და ვინ მართალი. ვინ დამნაშავე და ვინ უდანაშაულო„ - განაცხადა მიხეილ რამიშვილმა.
თბილისის სააპელაციო სასამართლომ უცვლელად დატოვა საქალაქო სასამართლოს გადაწყვეტილება ე.წ. ციანიდის საქმეში მსჯავრდებულ დეკანოზ გიორგი მამალაძისთვის 9 წლიანი თავისუფლების აღკვეთის შესახებ. როგორც ცნობილია, დაცვის მხარე საკასაციო საჩივარს უზენაეს სასამართლოში შეიტანს.