კლუბ ”ბასიანთან” მომხდარ შემთხვევას შინაგან საქმეთა მინისტრი, გიორგი გახარია ეხმიანება და აცხადებს, იმ საზოგადოებაში,
„იქ, სადაც საქმე ეხება პოლიციელის უსაფრთხოებას და ღირსებას, ჩვენ ვიქნებით უკომპრომისოები და ამას აქვს მარტივი ახსნა. იქ იმ საზოგადოებაში, სადაც პოლიციელი არ არის დაცული, საზოგადოების უსაფრთხოებაზე გარანტიას ვერ მოგცემთ ვერავინ. ეს არის პრინციპულად მნიშვნელოვანი,“ - განაცხადა შს მინისტრმა.
შეგახსენებთ, 13 იანვარს, თამაზ ქვლივიძემ კლუბ „ბასიაის“ დაცვის ორი თანამშრომელი და დიდუბე-ჩუღურეთის სამმართველოს მე-4 განწყოფილების უფროსის მოადგილე დაჭრა.
მან სამივე პირს ჭრილობები ცივი იარაღით მიაყენა. მართალია ქვლივიძე შემთხვევიდან მალევე დააკავეს, თუმცა 30 000 ლარის ოდენობის გირაოს სანაცვლოდ გაათავისუფლეს.
გიორგი გახარიას თქმით, საქალაქო სასამართლოს აღნიშნული გადაწყვეტილება პროკურატურამ უკვე გაასაჩივრა.
გავრცელებული ინფორმაციით ქვლივიძე კლუბში მეგობართან, მიხეილ სვანიძესთან ერთად იმყოფებოდა, რომელიც სასამართლომ ადმინისტრაციული მუხლით გაათავისუფლა. მოსამართლე, რომელმაც სამი მუხლით ბრალდებული თამაზ ქვლივიძის გირაოს სანაცვლოდ გათავისუფლების გადაწყვეტილება მიიღო, 37 წლის ბადრი შონიაა, რომელიც 2011 წლის ნოემბრიდან თბილისის საქალაქო სასამართლოს სისხლის სამართლის საქმეთა კოლეგიის მოსამართლეა. ის მონაწილეობდა ისეთ გახმაურებულ საქმეებში, როგორიცაა ე.წ. ციანიდის, ივანე მერაბიშვილის, ბანკი"ქართუს" გაკოტრების,"რეპერების საქმე", იგი ასევე გახლდათ 7 ნოემბრის საქმეზე უგულავას, ადეიშვილის, კეზერაშვილისა და მერაბიშვილის საქმის მოსამართლე, თუმცა ამ უკანასკნელს ჩამოშორდა.
ცნობილია ისიც, რომ ბადრი შონია თავის დროზე საქალაქო სასამართლოს თავმჯდომარეს მამუკა ახვლედიანს დაუპირისპირდა. შინაგან საქმეთა სამინისტროს ინფორმაციით, ბრალდებულ ქვლივიძეს ბრალი წარედგინა ჯანმრთელობის განზრახ მძიმე (117-ე მუხლის 1-ლი ნაწილი) და განზრახ ნაკლებად მძიმე (118-ე მუხლის 1-ლი ნაწილი) დაზიანებისთვის, აგრეთვე პოლიციის მიმართ წინააღმდეგობისთვის. სსკ-ის 117-ე მუხლი სამიდან ექვს წლამდე, 118-ე მუხლი - ერთიდან სამ წლამდე, ხოლო 353-ე მუხლი ორიდან ხუთ წლამდე თავისუფლების აღკვეთას ითვალისწინებს.
თამაზ ქვლივიძე ბიზნესმენ პაატა ქვლივიძის შვილია. პაატა ქვილივიძე „თბილგვირაბმშენის“ უფროსია.
,,ადამინის უფლებების სწავლებისა და მონიტორინგის ცენტრი" ბრალდებულის გათავისუფლების კანონიერების შესწავლას გეგმავს.
