საქართველოს პრემიერს მოკითხვა გადაეცით ჩემგან, მას ადრე თუ გვიან, მოუწევს პასუხის გაცემა - ამის შესახებ საქართველოდან გატაცებულმა ჟურნალისტმა, აფგან მუხთარლიმ "კურიერის" ჟურნალისტს განუცხადა, რომელსაც მუხთარლიმ კამერის გარეშე ესაუბრა.
"რუსთავი 2"-ის ინფორმაციით, მუხთარლი აცხადებს რომ საქართველოს პრემიერ და შინაგან საქმეთა მინისტრებმა ეს ყველაფერი დაგეგმეს და სახელმწიფო დონის დანაშაული ჩაიდინეს.
"ჩემი მოტაცების დამკვეთები და შემსრულებლები არსებობენ. საინტერესოა, რომ იმ დღეს თბილისში არც ერთი კამერა არ მუშაობდა. საქართველოს პრემიერს მოკითხვა გადაეცით ჩემგან. მას ადრე თუ გვიან, მოუწევს პასუხის გაცემა. კვირიკაშვილი და შინაგან საქმეთა მინისტრი, ყველამ ერთად დაგეგმა და სახელმწიფო დონეზე ჩაიდინა დანაშაული", - აღნიშნავს მუხთარლი.
"კურიერის" ცნობით, მუხთარლი ასევე ამბობს, რომ ის თბილისში, სახლთან ახლოს, პოლიციის სამმა თანამშრომელმა ძალით ჩასვა მანქანაში და თავზე ტომარა ჩამოაცვა.
"შემდეგ მეორე მანქანაში გადავჯექით, 1 საათის შემდეგ კი მესამეში. მესამე მანქანაში გადაჯდომიდან 15 წუთის შემდეგ, მომხსნეს ტომარა და აღმოვაჩინე, რომ აზერბაიჯანში ვარ. გზაზე ჩემთან ერთად სამი ადამიანი იყო. ისინი კრიმინალური პოლიციის ფორმებით იყვნენ და ქართულად მესაუბრებოდნენ. წინააღმდეგობა სპეციალურად არ გამიწევია, რადგან მივხვდი, რომ კრიმინალური პოლიციიდან იყვნენ, შემეშინდა ჩემი დეპორტაცია არ მოეხდინათ და წყნარად ვიჯექი მანქანაში“, - უთხრა მუხთარლიმ "კურიერს".