„პროცესუალურად უკვე ბუკას დაკითხვის ეტაპია, მაგრამ ზუსტად არ ვიცით, ჩვენებას მისცემს თუ არა. პროკურატურიდან ელოდება რაღაც პასუხს, ამაზე იქნება დამოკიდებული, მისი პოზიცია“, - განუცხადა „ჯი-ეიჩ-ენს“ ადვოკატმა, მარინა ცუცქირიძემ.
როგორც ადვოკატი დასძენს, რჩეულიშვილი ამასთან დაკავშირებით კომენტარს პროცესის დაწყებამდე გააკეთებს. თუკი, ჩვენების მიცემას გადაწყვეტს, ის მისი ბრალდების ირგვლივ ისაუბრებს.
„სცნობს თუ არა თავს დამნაშავედ, ამაზე ისაუბრებს, ის როგორც პროკურატურის, ასევე დაცვის მხარის შეკითხვებს გასცემს პასუხს“, - აცხადებს ცუცქირიძე.
როგორც ადვოკატი განმარტავს, „ცენტრ პოინტის“ საქმეზე ინვესტორებთან მოლაპარაკებები კვლავ გრძელდება.
„ისევ მოლაპარაკებების ეტაპზე ვართ, თუმცა, ბოლოში ვართ გასულები. ვფიქრობ, მოლაპარაკებები ახლო მომავალში დასრულდება. რაღაც მიზეზის გამიჯვნა და ამის შემდეგ ხელის მოწერა მოითხოვეს. ამ მიზეზის გამიჯვნაზე აქტიურად ვმუშაობთ“, - განაცხადა ადვოკატმა.
„ცენტრ პოინტის“ საქმის განხილვა თბილისის საქალაქო სასამართლოში დღეს, 12:00 საათზე განახლდება.
