„სამწუხაროდ, ვერც მთავრობა და ვერც საპარლამენტო უმრავლესობა ფაროსანას პრობლემის მასშტაბებს ვერ აცნობიერებს", - ამის შესახებ საპარლამენტო უმცირესობის წევრმა აკაკი ბობოხიძემ პარლამენტის სხდომაზე ფაროსანას პრობლემის შესახებ სიტყვით გამოსვლისას განაცხადა.
მისივე განცხადებით, პრობლემის ზონად მხოლოდ სამეგრელო განისაზღვრა, დაიხარჯა 16 მლნ ლარი და პრობლემას მაინც ვერ ეშველა.
"სოფლის მეურნეობის სამინისტრო რომელიც წარმატებულ უწყებად დასახელდა, მხოლოდ პროპაგანდის დონეზე ებრძვის პრობლემას. მე გთხოვთ გაისიგრძეგანოთ ამ პრობლემის მნიშვნელობა, თორემ მომავალ წელს ჩვენ სერიოზული გამოწვევის წინაშე დავაყენებთ საქართველოს მოსახლეობას.
უზარმაზარი ღონისძიებები გაქვთ ჩასატარებელი და ამ ყველაფერს ათეულობით მილიონი ლარი არ ეყოფა. ფაროსანა არ დატოვებს სოფლის მეურნეობისგან არაფერს. სანამ საქართველოს არეალშია ეს პრობლემა, კარგად დავფიქრდეთ", - განაცხადა "ევროპული საქართველოს" წევრმა აკაკი ბობოხიძემ.