საია აპირებს, ცენტრალური საარჩევნო კომისიის წინააღმდეგ სასამართლოს მიმართოს.
ასოციაციის იურისტის, ირმა პავლიაშვილის განცხადებით, საინტერესოა სასამართლო განმარტება როგორი იქნება ცესკო-ს გადაწყვეტილებასთან დაკავშირებით, რომლის მიხედვითაც ცესკომ თბილისში ჩატარებული საქველმოქმედო საფეხბურთო მატჩი პოლიტიკურ აგიტაციად არ ჩათვალა.
“როგორც კი ანდრეი შევჩენკოს კომენტარი გავრცელდა, ჩვენ დაუყოვნებლივ განცხადებით მივმართეთ ცესკო-ს. განცხადებაში საუბარი იყო, რომ შევჩენკო კახი კალაძის მხარდასაჭერად იყო ჩამოსული და ის მიიჩნევდა, რომ კალაძე კარგი მერი იქნებოდა. აქედან გამომდინარე, ამ შემთხვევას ვაფასებთ, როგორც სააგიტაციო ღონისძიებას და ადგილი ჰქონდა ამ შემთხვევაში უკანონო აგიტაციას, იქიდან გამომდინარე, რომ უცხო ქვეყნის მოქალაქე მონაწილეობდა აგიტაციაში. ამ შემთხვევაში ადგილი ჰქონდა კანდიდატის ხელშეწყობას და მეორე შემთხვევაში უცხო ქვეყნის მოქალაქეებს კანონით ეკრძალებათ საააგიტაციო ღონისძიებაში მონაწილეობა. ეს ღონისძიება მიმართული იყო იმ კუთხით, რომ ადგილი ჰქონოდა აგიტაციას“, - განაცხადა ირმა პავლიაშვილმა.
ცნობისთვის, დღეს, ცესკო-ს თავმჯდომარემ, თამარ ჟვანიამ დღეს განაცხადა, რომ 29 სექტემბერს, საქველმოქმედო მატჩის შემდეგ ანდრეი შევჩენკოსა და პაოლო მალდინის განცხადებები წინასაარჩევნო კამპანიის წესების დარღვევას ვერ ხედავს.
