ხმაურის შესახებ მიღებული ახალი რეგულაციები 15 აგვისტოდან ამოქმედდა. თუმცა, მოსახლეობის ნაწილი აცხადებს, რომ 112-ში დარკევის შემდეგ ადგილზე გამოცხადებული საპატრულო პოლიციის თანამშრომლები ამბობენ, რომ ისინი სპეციალური აპარატურით, ე.წ. ხმაურმზომებით აღჭურვილები არ არიან.
„წლებია, რაც დაბა ურეკში სააგარაკო სახლი მაქვს და რესტორნის ხმაური მაწუხებს. წინა წლებში პატრული მათ გაჩუმებას ახერხებდა, მაგრამ წელს უკვე გამოუვალი სიტუაციაა. როცა აქ მუსიკა უკრავს, ამ სახლში მაცხოვრებლებს ერთმანეთის ყვირილიც კი არ გვესმის, ბავშვები ვერ იძინებენ, ურეკი კი საბავშვო კურორტია.
ახალი კანონის ამოქმედების შემდეგ, 112-ში დავრეკე, ადგილზე მოსულმა საპატრულო პოლიციის თანამშრომლებმა მითხრეს, რომ სპეცილური აპატარტურა არ ჰქონდათ. გადავიდნენ და უბრალოდ სთხოვეს, თუ შეგიძლიათ ხმამაღლა არ დაუკრათო. რა თქმა უნდა, მათ ეს არ გაუთვალისიწნებიათ. შსს-ს პასუხისმგებლობას ირიდებს, ამბობს რომ აპარატურა დარიგებული აქვთ, მაგრამ რეალურად ასე არ არის“, - აცხადებს „ჯი-ეიჩ-ენ-თან“ თეონა ჯაყელი, რომელიც დაბა ურკეში სააგარაკო სახლის მფლობელია.
შსს-ში კი აცხადებენ, რომ საქართველოს მასშტაბით საკმარისი რაიოდენობის სპეციალური აპარატურა აქვთ იმისთვის, რომ ყველა შემთხვევაზე რეაგირება მოახდინონ თუკი, კანონდარღვევა დაფიქსირდება.
„თუ შეტყობინება 11 საათის შემდეგ არ იყო შემოსული, უფლება არ გვქონდა სიტყვიერი გაფრთხილების გარდა სხვა რამ გაგვეკეთებინა. გუშინ პრეზენტაცია გავაკეთეთ, აპარატურა ვაჩვენეთ, ეს გადაღებულია კიდეც, კადრებიც შეგიძლიათ ნახოთ“,-აცხადებენ შსს-ში.
შეგახსენებთ, რომ ახალი რეგულაციის მიხედვით, ხმაურის ზღვრული ნორმები 30-და 55 დეციბალის ფარგლებში მერყეობს, რომელთა გადამეტების შემთხვევაში პირველ ჯერზე ფიზიკური და იურიდიული პირები გაფრთხილებას მიიღებენ, ერთი წლის განმავლობაში განმეორების შემთხვევაში საჯარიმო სანქცია ამოქმედდება კონკრეტული სუბიექტის მიმართ.
ფიზიკური პირი, პირველი გაფრთხილების შემდეგ მეორის ჩადენაზე დაჯარიმდება 150 ლარით, ხოლო იურიდიული პირი 500 ლარით. მესამედ და მომდევნო ჯერზე დარღვევისთვის, ფიზიკურ პირს 300- ლარიანი ჯარიმა, ხოლო იურიდიულ პირს 1000-ლარიანი ჯარიმა გამოეწერება, ყოველ ჯერზე, წლის განმავლობაში.