„რკინიგზელთა ახალი პროფკავშირის" თავმჯდომარის, ვიტალი გიორგაძის განცხადებით, მოშიმშილე რკინიგზელებს საქართველოს რკინიგზიდან ღამის განმავლობაში არ გამოხმაურებიან.
მისივე თქმით, რკინიგზის ინფრასტრუქტურის დირექტორის მიერ გაკეთებული განცხადება, რომლის მიხედვითაც უახლოეს დღეებში თუ ეს ადამიანები სამსახურში არ გამოცხადდებიან, მათ სამსახურიდან გაათავისუფლებენ, პროვოკაციულია.
"შიმშილობის აქცია გრძელდება მიუხედავად ძალიან რთული პირობებისა, როგორც მოგეხსენებათ ჩვენ არ მოგვეცა შესაძლებლობა გაგვეშალა კარვები და მთელი ღამის განმავლობაში მოუწიათ ადამიანებს მჯდომარე აქცია გაეგრძელებინათ. რაც შეეხება რკინიგზის გუშინდელ განცხადებას, თითქოს რამე შემოთავაზება აქვთ ამ ადამიანებთან, კიდევ ერთხელ ვამბობთ, რომ ამ ადამიანებთან არანაირი შემოთავაზება არ ყოფილა, მხოლოდ და მხოლოდ მედიის საშუალებით ვიგებთ ამას. მათ არავინ ელაპარაკება, არავინ ეუბნება რას სთავაზობენ"- განაცხადა ვიტალი გიორგაძემ.
მიგვაჩნია, რომ ის ქმედებები, რაც გუშინ განახორციელა რკინიგზის ინფრასტრუქტურის დირექტორმა ვასილ ხორავამ, ეს არის პროვოკაცია და ულტიმატუმი. ჩვენ ვგეგმავთ გავზარდოთ სოლიდარობა და კიდევ უფრო გავაძლიეროთ ამ ადამიანების მხარდაჭერა. იმ შემთხვევაში თუ არ დაკმაყოფილდება ჩვენი მოთხოვნები და რკინიგზა არ წამოვა დიალოგზე, ეს პროტესტი კიდევ უფრო მასშტაბური გახდება", - განაცხადა ვიტალი გიორგაძემ.
შეგახსენებთ, რომ აქციის მონაწილეები გურჯაანიდან სადახლოს ხაზზე გადაყვანას გუშინ 12 საათიდან შიმშილობით აპროტესტებენ.
