შრომის, ჯანმრთელობისა და სოციალური დაცვის მინისტრ დავით სერგეენკოს განცხადებას, რომ არანაირი ახალ საზღვრებზე გადმოწევა არ ხდება, გამოეხმაურა ფრაქცია ”ევროპული საქართველო - მოძრაობა თავისუფლებისთვის” წევრი გიორგი ტუღუში.
მისი თქმით, ეს არის როგორც მინიმუმ, შეგნებული მავნებლობა ხელისუფლების მხრიდან საკუთარი ხალხის და ქვეყნის წინააღმდეგ.
„როგორ უნდა მოვახდინოთ ჩვენ საერთაშორისო საზოგადოების კონსოლიდირება და ასევე მათი მხრიდან ზეწოლის განხორციელება რუსეთზე, როდესაც, საკუთარი ხელისუფლება მსგავსი მავნებლობით არის დაკავებული და საუბრობს იმაზე, რომ თურმე ოკუპაცია არ მომხდარა და რასაც ვხედავთ, ეს არის ნორმალური პროცესი,“ - განაცხადა გიორგი ტუღუშმა.
შეგახსენებთ, რომ დავით სერგეენკოს თქმით, საოკუპაციო ხაზის გადმოწევის აღწერისას გამოიყენება ტერმინი მცოცავი ოკუპაცია, რაც არ არის სწორი.
"ძალიან ხშირად, სამწუხაროდ, ამ ქმედებების აღწერისას გამოიყენება ტერმინი მცოცავი ოკუპაცია, რომელიც თავის საფუძვლით არ არის სწორი. ეს არანაირი მცოცავი და ეტაპობრივი არ არის, ეს არის, სამწუხაროდ, იმ ფარგლების, იმ საზღვრების დადგენა, რომელსაც 2008 წელს, ძალიან სამწუხაროდ, ლეგიტიმაცია გაუკეთა მაშინდელმა მთავრობამ. არანაირი ახალ საზღვრებზე გადმოწევა არ ხდება",- განაცხადა დავით სერგეენკომ.