იუსტიციის უმაღლესმა საბჭომ მოსამართლეთა გადანიშვნა-დაწინაურების შესახებ რეგლამენტში შესატან ცვლილებებზე მსჯელობა სექტემბრამდე გადადო.
მოსამართლეთა გადანიშვნა შესაძლოა ღია კონკურსის გარეშე მოხდეს. იუსტიციის უმაღლესი საბჭოს რეგლამენტში დაგეგმილ ცვლილებაზე დღეს უნდა ემსჯელა. საუბარია ინსტანციების შიგნით მოსამართლეთა ადგილმონაცვლეობაზე. ახალი რეგულაციით, გადაწყვეტილებას საბჭო ერთპიროვნულად მიიღებს.
"ჩვენ გავიზიარებთ საერთაშორისო გამოცდილებას და აუცილებლად გვექნება მსჯელობა მოსამართლეებთან შეხვედრისას ვინაიდან, პირველ რიგში, მოსამართლეებს უნდა ვკითხოთ, რას ფიქრობენ და უნდა გავიზიაროთ მათი პოზიცია, ასევე უნდა გავიზიაროთ კვლევები და ანგარიშები, რომელიც ამ საკითხს ეხება. სექტემბრიდან ამ საკითხზე დავიწყებთ ინტენსიურ მუშაობას და შევაჯერებთ ვერსიებს", - ამის შესახებ იუსტიციის უმაღლესი საბჭოს წევრმა ნაზი ჯანეზაშვილმა ჟურნალისტებს მას შემდეგ განუცხადა, რაც საბჭომ საკითხის გადადების გადაწყვეტილება მიიღო.