საქართველოს პარლამენტი პრეზიდენტ გიორგი მარგველაშვილის ვეტოს დაძლევის საკითხზე სავარაუდოდ, მომავალ კვირაში იმსჯელებს.
პარლამენტის საპროცედურო საკითხთა კომიტეტის თავმჯდომარის, გიორგი კახიანის განცხადებით, ვინაიდან, პრეზიდენტის ვეტო არდადეგებს დაემთხვა, რეგლამენტის გათვალისწინებით, შესაძლებლობა არსებობს, რომ ვეტო საშემოდგომო სესიაზე განიხილონ ან რიგგარეშე სხდომა მოიწვიონ.
„უმრავლესობაში ამ საკითხზე კონსულტაციები იქნება, მაგრამ ვინაიდან ეს ისეთი კანონპროექტებია, რომლებიც თვითმართველობის არჩევნებს უკავშირდება. არ გამოვრიცხავ, რომ ეს მომდევნო კვირაში მოხდეს", - განაცხადა კახიანმა.
საქართველოს პრეზიდენტმა გიორგი მარგველაშვილმა თვითმმართველობის კოდექსსა და საარჩევნო კოდექსში ცვლილებებს ვეტო დაადო.
აღნიშნული გადაწყვეტილების შესახებ პრეზიდენტმა დღევანდელ ბრიფინგზე განაცხადა.
ვეტოს დადების თხოვნით საქართველოს პრეზიდენტს ჯერ არასამთავრობო ორგანიზაციების ნაწილმა, შემდგომ კი ოპოზიციურმა პარტიებმა მიმართეს.