ფოთის ბაზრობის დირექტორის, თეა ბელქანიას ინფორმაციით, მოვაჭრეებს ბიზნესი დაზღვეული არ ჰქონიათ.
მისივე თქმით, ღამის საათებში, ბაზრობის ტერიტორიაზე ელექტროენერგიის სისტემიდან გათიშვა ხდება და გამორიცხულია ხანძარი ელექტროსადენებს გასჩენოდა.
ამასთანავე, ერთ-ერთმა დაზარალებულმა თვითმკვლელობა სცადა. 40 წლამდე ქალმა ბასრი საგნით ვენები გადაიჭრა. იგი სასწრაფო-სამედიცინო დახმარების ბრიგადამ ფოთის ცენტრალურ კლინიკურ საავადმყოფოში გადაიყვანა.
შეგახსენებთ, რომ ხანძარი ფოთის ბაზრობაზე დღეს დილით გაჩნდა.
ამ ეტაპზე ცეცხლი ლოკალიზებულია, თუმცა ადგილზე რჩება გარკვეული კერები, რაც ცეცხლის აალების საშიშროებას არ გამორიცხავს.
ცეცხლი დაახლოებით, 2000 კვადრატულ მეტრ ფართობზე იყო გავრცელებული.
ფოთის მერის ირაკლი კაკულიას განცხადებით, არსებობს შეკითხვები, რომლებსაც პასუხი უნდა გაეცეს.
შინაგან საქმეთა სამინისტროს ინფორმაციით, ფოთის ბაზრობაზე მომხდარ ხანძართან დაკავშირებით გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.
ხანძრის გაჩენის მიზეზი ჯერჯერობით უცნობია.
