დიანა ბერიძის მკვლელობაში ბრალდებული ბერძენი ანგიოქირურგი დღეს გამომძიებლების კითხვებს 2 საათის განმავლობაში პასუხობდა. როგორც „ჯი-ეიჩ-ენ“-ისთვის გახდა ცნობილი, ის კვლავ არ მიიჩნევს თავს დამნაშავედ.
„იდუმალებით მოცული შემთხვევაა. ექიმი არ აღიარებს, რომ ეს განზრახ მკვლელობა იყო. როგორც ის ამბობს, მან სამედიცინო შეცდომა დაუშვა. ანგიოქირურგმა გამომძიებლებს უთხრა, რომ დიანა ბერიძეს ანესთეზიის საჭირო დოზა გაუკეთა. თუმცა, ორგანიზმში წამლის ზუსტი დოზის დადგენა ექსპერტიზის საშუალებით ვერ მოხერხდა, რადგან როცა დიანას სხეული იპოვეს, ის უკვე გახრწნილი იყო.
გამომძიებლების თქმით, ბერიძის სიკვდილი სწორედ წამლებით იყო გამოწვეული. ანგიოქირურგს ჰკითხეს კიდეც, თუ საიდან მოიტანა საანესთეზიო პრეპარატი, რაზეც მან ასეთი პასუხი გასცა: საოპერაციოში რომ შევედი, დასაძინებელი საშუალება ანესთეზიოლოგების მიერ გამზადებული დამხვდაო“,- აცხადებს „ჯი-ეიჩ-ენ“-თან საუბარში საბერძნეთში მცხოვრები ქართველი ემიგრანტი.
როგორც ცნობილია, ბრალდებულმა ექიმმა უკვე მეორედ მოითხოვა სპეციალური ხელბორკილით თავისუფლებაში ყოფნა, თუმცა, მან ორივე ჯერზე უარი მიიღო. ის ბერძნულმა სასამართლომ საზოგადოებისთვის საშიშ პიროვნებად მიიჩნია, რადგან მკვლელობა სრულიად მშვიდ ფსიქოლოგიურ მდგომარეობში ჩაიდინა.
„გამომძიებლის კითხვაზე, თუ ეს სამედიცინო შეცდომა იყო, გვამი რატომ გადააგდო, ასე რატომ მოიქცა, ქირურგმა უპასუხა, რომ პანიკაში ჩავარდა და ამის გამო გადამალა ცხედარი... როცა ანგიოქირურგმა დიანა ბერიძის ცხედარი მანქანის საბარგულში ჩადო, ის ცოცხალი, იყო, თუმცა, თვითონ მკვდარი ეგონა. სწორედ საბარგულში ჩადების დროს მიაყენა მას სხეულზე დაზიანებები. ეს ექსპერტიზამაც დაადასტურა“, - განუცხადა „ჯი-ეიჩ-ენ“-ს ქართველმა ემიგრანტმა.
შეგახსენებთ, რომ 36 წლის ქართველი ქალის კვალი 26 აპრილს, იპოკრატიოს საავადმყოფოში მისვლის შემდეგ გაქრა. მას ბერძენი სამართალდამცავები რამდენიმე დღის განმავლობაში ეძებდნენ. დიანა ბერიძის ცხედარი 4 მაისს, კუნძულ ხალხიდიკზე, ერთ-ერთ სოფელში იპოვეს. გარდაცვლილი ქმარმა საყურით ამოიცნო. გვამის აღმოჩენიდან მალევე დააკევს 38 წლის ანგიოქირურგი, რომელიც განზრახ მკვლელობას ამ დრომდე არ აღიარებს.
