„ბონუსთან“ დაკავშირებით ძალიან მკაცრი ზღვარი წესდება, - ამის შესახებ პარლამენტის თავმჯდომარემ ირაკლი კობახიძემ კონსტიტუციაში დაგეგმილი ცვლილებების პროექტის იმ ნაწილთან დაკავშირებით განაცხადა, რომელიც ე.წ. გადაუნაწილებელი მანდატების გადანაწილებას ეხება.

მისი თქმით, პირველი, ეს არის აბოსულუტური ზედა ზღვარი, რაც იმას ნიშნავს, რომ ”ბონუსის” ხარჯზე პარტია 89 მანდატზე მეტს ვერ მიიღებს.

"მეორე, ეს არის ფარდობითი ზედა ზღვარი, რაც იმას ნიშნავს, რომ დამატებითი მანდატების რაოდენობამ ძირითადი მანდატების 35%-ს არ უნდა გადააჭარბოს. მაგალითად, თუკი პარტია ძირითადი მანდატების სახით 40%-ს იღებს, ის ”ბონუსის” ხარჯზე ვერ მიიღებს მანდატების 54%-ზე მეტს. მესამე, ეს არის აბსოლუტური ქვედა ზღვარი, რაც იმას ნიშნავს, რომ თუკი პარტიას ”ბონუსის” ხარჯზე მანდატების რაოდენობა აბსოლუტურ უმრავლესობამდე - 76-მდე არ ევსება, ამ შემთხვევაში, ბონუსი აზრს კარგავს და ის არ განაწილდება”, - განაცხადა კობახიძემ.