საქართველოს საერთაშორისო საარბიტრაჟო ცენტრი (GIAC), 5 ივნისიდან, ბიზნეს სექტორის წარმომადგენლებთან და იურისტებთან ახორციელებს არბიტრაჟის შესახებ კამპანიას საქართველოს რეგიონებში. კამპანიის მიზანია არბიტრაჟის, როგორც დავის მოგვარების ალტერნატიული მექანიზმის შესახებ ცნობადობის ამაღლება.
პროექტი ხორციელდება საქართველოს საერთაშორისო საარბიტრაჟო ცენტრის მიერ ევროკავშირისა (EU) და გაეროს განვითარების პროგრამის (UNDP) დაფინანსებითა და საქართველოს სავაჭრო-სამრეწველო პალატის მხარდაჭერით.
პროექტის ფარგლებში პირველი შეხვედრა ქალაქ თელავში გაიმართა. 16-17 ივნისს შეხვედრები გორსა და ახალციხეში გაგრძელდა. ღონისძიებები ასევე ჩატარდება ქალაქ ქუთაისში, ფოთში, ზუგდიდში, ოზურგეთსა და ბათუმში.
არბიტრაჟის პოპულარიზაციის ერთ-ერთ მთავარ მიზეზს სასამართლოების გადატვირთულობა წარმოადგენს, რაც ხელს უშლის დავების ეფექტიან და სწრაფ გადაწყვეტას. აღნიშნული სიტუაცია კიდევ უფრო დამაბრკოლებელია ბიზნესის განვითარებისათვის მისი ქვეყნის ეკონომიკურ ზრდაზე გავლენის გათვალისწინებით. მიუხედავად არბიტრაჟის მრავალი უპირატესობისა, საქართველოში, განსაკუთრებით კი რეგიონებში, არბიტრაჟის ცნობადობის მაჩვენებელი ძალიან დაბალია. ამიტომ, საარბიტრაჟო ცენტრმა საჭიროდ მიიჩნია სამუშაო შეხვედრების ჩატარება ბიზნესის წარმომადგენლებთან დავის ალტერნატიული მექანიზმების გაცნობისა და მისი უპირატესობების წარმოჩენისათვის.
ღონისძიება მიზნად ისახავს არბიტრაჟის, როგორც დავების გადაწყვეტის მექანიზმის შესახებ ცნობადობის ამაღლებას და მისი გამოყენებით დავების გადაწყვეტის უპირატესობების წარმოჩენას სასამართლოსთან შედარებით. შეხვედრებზე, რომლებიც საქართველოს რვა რეგიონულ ცენტრში გაიმართება, განხილული იქნება ბიზნეს დავების გადაწყვეტასთან დაკავშირებული აქტუალური საკითხები.
საარბიტრაჟო ცენტრის გენერალური მდივანი, ბექა ინჯია და ევროკავშირისა და გაეროს ერთობლივი პროექტის „ხელმისაწვდომი მართლმსაჯულება და ბავშვზე მორგებული მართლმსაჯულების სისტემის განვითარება საქართველოში“ დავების ალტერნატიული გადაწყვეტის ექსპერტი ლიანა ქარცივაძე ისაუბრებენ საქართველოს საერთაშორისო საარბიტრაჟო ცენტრის, მისი საქმიანობის, დავის განხილვის ეტაპებისა და იმ სიახლეების შესახებ, რაც საარბიტრაჟო ცენტრის საქმიანობით ინერგება. შეხვედრაზე განხილული იქნება საარბიტრაჟო ცენტრის მიერ ახლად დამტკიცებული დაჩქარებული საარბიტრაჟო პროცედურები, რომლებიც მორგებულია ბიზნესის ინტერესებზე და დავის განხილვის პროცედურას უფრო ეფექტიანსა და ხელმისაწვდომს ხდის.
პრეზენტაციების შემდეგ გაიმართება დისკუსია, სადაც დამსწრე საზოგადოებას შესაძლებლობა ექნება დამატებითი კითხვები დაუსვან მომხსენებლებს დავების მოგვარების საკითხებთან დაკავშირებით.