აშშ-ის სახელმწიფო დეპარტამენტი 2018 წელს საქართველოს დასახმარებლად 34 მილიონ 100 ათასი აშშ დოლარის გამოყოფას გეგმავს, - ამის შესახებ აშშ-ის საგარეო უწყების მიერ გამოქვეყნებულ მომავალი წლის ბიუჯეტის პროექტშია ნათქვამი.

საქართველოსთვის აშშ-ის სახელმწიფო დეპარტამენტის მიერ 2016 წელს დამტკიცებული და დღემდე მოქმედი დახმარების მოცულობა 80 მილიონზე მეტია.

განმარტებით ბარათში მოცემულია დახმარების პროგრამები, რომლებშიც საქართველო მოხვდა. კერძოდ, “ევროპის და ევრაზიის” დახმარების პროგრამაში სახელმწიფო დეპარტამენტი საქართველოსთვის 28 მილიონი დოლარის გამოყოფას ითხოვს. 3 მილიონი დოლარი გათვალისწინებულია საქართველოში ტრანსნაციონალური ორგანიზებული დანაშაულთან ბრძოლისთვის. კიდევ 0.9 მილიონი სტრატიგიული ვაჭრობის კონტროლის კანონმდებლობის იმპლემენტაციაზეა გათვლილი. 2.2 მილიონი დოლარი განსაზღვრულია ქართველი ჯარისკაცების წვრთნის პროგრამებისთვის. საქართველო ასევე მიიღებს დახმარებას, რომელიც  რეგიონში იძულებით გადაადგილებული პირებისა და ლტოლვილების დასახმარებლადაა გათვალისწინებული.

"საზოგადოებრივი მაუწყებლის" ინფორმაციით, სახელმწიფო დეპარტამენტის 2018 წლის ბიუჯეტის პროექტში სამხედრო დახმარებისთვის  თანხა გათვლილი არ არის, როდესაც 2016 წელს დამტკიცებული და დღემდე მოქმედი ბიუჯეტის ამ პუნქტში გათვალისწინებული იყო 30 მილიონი დოლარი.

ამასთან, ზოგადად აშშ-ის ბიუჯეტის პროექტის მიხედვით, მომდევნო 10 წლის განმავლობაში  სახელმწიფო ხარჯი $3,6 ტრილიონით უნდა შემცირდეს. აღნიშნული სეკვესტრი აშშ-ის ისტორიაში უმსხვილესია. 32-პროცენტიანი შემცირება იგეგმება აშშ-ის სახელმწიფო დეპარამენტის ბიუჯეტშიც.

გარდა ამისა, სახელმწიფო დეპარტამენტის მიერ გავრცელებულ დოკუმენტში ნათქვამია, რომ აშშ-ი განაგრძობს საქართველოში რეფორმების მხარდაჭერას.

ტექსტში ვკითხულობთ: “სახელმწიფო დეპარტამენტი განაგრძობს უკრაინის, საქართველოს და მოლდოვას მხარდაჭერას, რათა მათ საკუთარი მომავლი თავად განსაზღვრონ, როდესაც ისინი ატარებენ კრიტიკულ რეფორმებს პოლიტიკური სისტემის, ეკონომიკის და თავდაცვის განსამტკიცებლად. სახელმწიფო დეპარტამენტი კვლავ მხარს უჭერს მოლდოვასა და სამხრეთ კავკასიაში კონფლიქტების მშვიდობიანი გზით მოგვარებას”.

განმარტებით  ბარათში ასევე ნათქვამია, რომ “რუსეთის აგრესია უკრაინაში, ყირიმის, საქართველოს და მოლდოვას ნაწილების ოკუპაცია ეწონააღმდეგება სუვერენიტეტის და ტერიტორიულო მთლიანობის საერთაშორისო პრინციპებს“.