ბრალდებული დეკანოზ გიორგი მამალაძის ადვოკატი ბრალის დამძიმებას აბსურად აფასებს. მისი თქმით, მამალაძეს არანაირი ინტერესი არ ჰქონდა შორენა თეთრუაშვილის მიმართ.
“მამა გიორგი მამალაძეს ვერანაირი ინტერესი ვერ ექნებოდა შორენა თეთრუაშვილის მიმართ, მაშინ როცა საპატრიარქოში მისი თანამდებობა, სტატუსი, ასევე ფინანსური და მატერიალური მდგომარეობა გაცილებით უკეთესი იყო . დანაშაულის ჩადენა ანგარების მოტივით წარმოუდგენელია. წარდგენილი ბრალი კი კიდევ უფრო გაურთულებს საქმეს პროკურატურას“,- განაცხადა ჟურნალისტებთან ადვოკატმა გიორგი ფანცულაიამ.
იგი პროკურატურის განცხადებებსაც შეეხო და კვლავ გაიმეორა მოთხოვნა, რათა საგამოძიებო უწყებამ დაანონსებული მტკიცებულებები გამოაქვეყნოს.
"სამი თვეა მოვუწოდებ პროკურატურას, გაავრცელოს ჩანაწერის სრული ვერსია, რადგან ასე კიდევ ერთხელ დამტკიცდება მამალაძის უდანაშაულობის საკითხი. საზოგადოებას კი სრული წარმოდგენა შეექმნება საქმეზე”, - განაცხადა ადვოკატმა.
პროკურატურამ დეკანოზისთვის ბრალის დამძიმების შესახებ განცხადება დღეს გაავრცელა. მათი თქმით, საქმე ეხება ანგარებით, თანამდებობრივი მდგომარეობის და მატერიალური სარგებლის შენარჩუნების მოტივით - განზრახ მკვლელობის მომზადებას, რის საფუძველზეც 2017 წლის 26 აპრილს, გიორგი მამალაძეს დაუმძიმდა ბრალდება სსკ-ის 18, 109-ე მუხლის მე-3 ნაწილის „გ“ ქვეპუნქტით, რაც გულისხმობს განზრახ მკვლელობის მომზადებას ანგარებით და 16-დან 20 წლამდე პატიმრობას ითვალისწინებს.