„ჩვენ, „ევროპულ საქართველოს“ გვაინტერესებდა რამოდენიმე მნიშვნელოვანი საკითხი, რომელიც იყო კონსტიტუციურად ფუნდამენტური და საჭირო იყო დარეგულირება“,- განაცხადა „ევროპული საქართველოს“ წევრმა, სერგი კაპანაძემ „ჯი-ეიჩ-ენთან“ საუბრისას.
იგი პარლამენტის ვიცე-სპიკერის, თამარ ჩუგოშვილის განცხადებას გამოეხმაურა, რომლის თქმითაც, ოპოზიციურ პარტიებს არჩევნების წესის გარდა კომისიაში სხვა ინტერესი არ ჰქონდათ.
მისი თქმით, პარტიისთვის მნიშვნელოვანი იყო, რომ ხელისუფლებისა და პრეზიდენტის არჩევის წესი დემოკრატიულ ჩარჩოებში ჩამჯდარიყო, რათა არ იყოს ხელისუფლების უზურპაციის საფრთხე.
„რაც მათ გააკეთეს, არის ის, რომ დატოვეს სახელი მთავარსარდალი და სახელმწიფოს მეთაური, შესაბამისი ფუნქციები კი აღარ დაუტოვეს. ჩვენი ინტერესი იყო ევროპული მიმართულების კონსტიტუციაში ასახვაც“, - განაცხადა კაპანაძემ.
როგორც კაპანაძემ „ჯი-ეიჩ-ენთან“ საუბრისას განაცხადა, სწორედ ხელისუფლებასთან ძირეული უთანხმოებები გახდა მიზეზი, რომლის გამოც მათმა პარტიამ დატოვა საკონსტიტუციო კომისია.
„მთავარი უთანხმოება, რომელიც გვაქვს ხელისუფლებასთან და რის გამოც გამოვედით კომისიიდან, არის არჩევნების წესი. ეს ქვეყნისთვისაა მნიშვნელოვანი, რათა დემოკრატიულად იფუნქციონიროს სახელმწიფომ და ხელისუფლებაც დემოკრატიული გზით შეიცვალოს. ასევე იყო პრეზიდენტის არჩევითობაც, თანაც იმის ფონზე, რომ მოსახლეობის აბსოლუტური უმრავლესობა მხარს უჭერს, რომ პრეზიდენტი აირჩიოს ხალხმა და არა ივანიშვილმა. ყოველივე აქედან გამომდინარე, ძალიან სამწუხაროა, რომ ამაზე იმ კონტექსტში საუბრობს პირველი ვიცე-სპიკერი, თითქოს მხოლოდ ეს არის ჩვენი ინტერესი. ეს არის ხალხის ინტერესი და სამწუხაროა, რომ თავად არ აინტერესებს ეს საკითხი“- განაცხადა სერგი კაპანაძემ „ჯი-ეიჩ-ენთან“ საუბარში.
