„ისედაც გაკოტრებული ენერგეტიკა, რომელშიც რამოდენიმე წელია ინვესტიციები არ შედის, არის საქართველოს ენერგეტიკულ-ეკონომიკური მაჩვენებელი“,- განაცხადა ფრაქცია „ნაციონალური მოძრაობის“ წევრმა, რომან გოცირიძემ „ჯი-ეიჩ-ენთან“.
მისი თქმით, მთავრობამ ამ სფეროს დაუკარგა საინვესტიციო მიმზიდველობა და მას შემდეგ აღარავის უნდა ფულის ჩადება.
„ქვეყანას არ აქვს იმის საშუალება, რომ თავად ააშენოს გიგანტური ჰიდროელექტროსადგური. ასევე გასათვალისწინებელია ისიც, რომ 3.5 მილიარდიანი ვალის აღებას აპირებენ შემდეგი 4 წლის განმავლობაში, რათა გზები და სხვა ინფრასტრუქტურული პროექტები განახორციელონ. ამას თუ სახელმწიფოს მიერ ენერგეტიკაში ფულის ჩადება ან მოზიდვა დაემატება, იქნება ძალიან ცუდი ფაქტი“- განაცხადა გოცირიძემ.
რომან გოცირიძის აზრით, სახელმწიფოს ნაცვლად ინვესტორები უნდა იყვნენ დაინტერესებული ენერგეტიკული პროექტებით და მათ ჩადონ უცხოური ინვესტიცია.
„ბიზნესი უნდა იყოს დაინტერესებული მსგავსი პროექტებით. ვინმეს რომ ეგ სფერო დაენახა როგორც მომგებიანი, თავად ინვესტორი ააშენებდა. ყოველივე ამის ფონზე ბიუჯეტიდან ფულის ხარჯვა არაა გონივრული, ხალხი გაღატაკებულია. ამიტომ, უაზრობაა ფულის ხარჯვა ისეთ პროექტებზე, რომელსაც უკუგება 20-30 წლის შემდეგ ექნება და არც არავინ იყიდის“,- „ჯი-ეიჩ- ენთან“ საუბარში განაცხადა რომან გოცირიძემ.
იგი არსებულ პროექტებსაც შეეხო და მთავრობას მათი პირადი მიზნებისთვის გამოყენებაში დასდო ბრალი: „გარდაბნის თბოელექტრო სადგური ააშენეს, გამოჩნდა მყიდველი, ებრაელი ინვესტორები და იმის გამო, რომ სახელმწიფო საწარმო მათ უნდათ როგორც საკუთრება, ნიშნავენ მეგობრებს, ნათესავებს. სახელმწიფო საწარმოები გადაქცეულია მთავრობის შემოსავლის წყაროდ“.
შეგახსენებთ, რომ ენერგეტიკის მინისტრმა, კახა კალაძემ ხუდონჰესის პროექტზე ისაუბრა. მისი თქმით, აღნიშნული პროექტი შესაძლოა თავად განახორციელოს და ინვესტორი არ გახდეს საჭირო.