მართვის მოწმობების 100-ქულიანი სისტემა 20-30%-ით შეამცირებს ავტოსაგზაო შემთხვევებს, - აცხადებს „ჯი-ეიჩ-ენთან“ საუბარში „პარტნიორობა საგზაო უსაფრთხოებისთვის“ წარმომადგენელი ირაკლი იზორია.
მისი თქმით, თავიდან დაგეგმილი იყო, რომ კანონი ძალაში პირველი ივნისიდან შესულიყო, თუმცა სამინისტროს მოთხოვნით, პირველ ივლისამდე გადაიწია. „უწყებას სურს რომ ჩაატაროს საინფორმაციო კამპანია და მოსახლეობას მაქსიმალურად მიაწოდოს ინფორმაცია“.
„100-ქულიანი სისტემა აპრობირებული მეთოდია და მრავალ ქვეყანაში გამოიყენება. იგი ძირითადად მიმართულია მძღოლების მიმართ, რომლებიც არღვევენ მაგრამ იხდიან და ისევ ქუჩაში გამოდიან. დაუმორჩილებელი მძღოლები რომ არ იყვნენ, ამიტომ ვიფიქრეთ 100-ქულიანი სისტემის შემოღება“, - აცხადებს „ჯი-ეიჩ-ენთან“ საუბარში ირაკლი იზორია და აღნიშნავს, რომ უკონტაქტო პატრული, რომელიც ასევე, ახალი კანონითა რის გათვალისწინებული, მანევრირების წესების დარღვევისა და სიჩქარის გადაჭარბების მხრივ ვითარებას შეამსუბუქებს.
„ვფიქრობთ, რომ თუ ეს ქულათა სისტემა დაინერგება და პატრულის მიერ აღსრულების მექანიზმი მაქსიმალურად იქნება გამოყენებული, შედეგს მივიღებთ. თუმცა ჩვენ შეიძლება კანონი მივიღოთ და აღსრულება არ იყოს, ამიტომ არასამთავრობო სექტორი მაქსიმალურად მოვუწოდებთ საპატრულო პოლიციას, რომ ქულათა სისტემის შემოღებისას გამოიჩინონ ყურადღება და ყველა ის აღსრულების მექანიზმი, რაც მათ გააჩნიათ“, - ამბობს იზორია. მისივე თქმით, ქულათა სისტემის შემოღება პატრულისათვის დამატებითი მოტივაცია იქნება, რომ დამრღვევი მძღოლები გამოავლინონ.
„კანონმდებლობაში არის გარკვეული ხარვეზები, მაგალითად ადრე თუ იყო 100-ლარიანი ჯარიმა სიჩქარის გადაჭარბებაზე, შემდეგ შემცირდა და 50 ლარი გახდა. ახლა ქულების სისტემიდან გამომდინარე, გაიზრდება ჯარიმები. ზოგადად კანონში არის მთელი რიგი ხარვეზები და არა მხოლოდ ერთ დარგში. ჩვენ არ გვყავს პრემიერ-მინისტრთან დაქვემდებული სპეციალური ჯგუფი, რომელიც საგზაო უსაფრთხოებას შეისწავლიდა. სხვა ქვეყნებში ამის დიდი პრაქტიკაა, საქართველოში კი ერთ საკითხზე მომუშავე ჯგუფები სხვა და სხვა უწყებებშია გაბნეული, ზოგი ეკონომიკის სამინისტროშია, ზოგი შინაგან საქმეთა სამინისტროშია, ზოგი სახმელეთო ტრანსპორტის სააგენტოშია და ეს გაბნეულობა ქმნის დაბნეულობას“, - აცხადებს „ჯი-ეიჩ-ენთან“ საუბარში ირაკლი იზორია.