“2017 წლის გაზაფხული ქართული სახელმწიფოსთვის ბოლო დროის ყველაზე მძიმე გაზაფხულია”, - განაცხადა "ქართულ-აფხაზური და ოსური ევროპული საერთაშორისო ორგანიზაციის EUGAO"-ს პრეზიდენტმა , პროფესორმა ნესტან კირთაძემ “ჯი-ეიჩ-ენთან” საუბრისას.
“ჩვენი და საერთაშორისო თანამეგრობრობის თვალწინ მოხდა ორი სასტიკი გადაწყვეტილება. საქართველოს ცხინვალის რეგიონს შესახებ უშლიან ისტორიულ მეხსიერებას და ასე ვთქვათ, ჰგლეჯენ ქართველს გულს და მეორე, აფხაზეთის მიმართულებით საკმაოდ მძიმე პოლიტიკური თვე იყო”-განაცხადა ნესტან კირთაძემ.
მან ოკუპირებული აფხაზეთის შესახებ ისაუბრა და დასძინა, რომ რუსეთის საგარეო საქმეთა მინისტრის მიერ იქ საელჩოს გახსნა მხოლოდ კომენტარებში ჩაიმალა და ხმამაღლა აღარავინ საუბრობს.
“ჩვენს კიდევ ერთხელ, არ ვიცი რამდენი წლით, მაგრამ დავცილდით ჩვენს ნაწილს, ჩვენს ნათესავ ხალხსა და ჩვენი სამშობლოს ერთიანობას. რუსეთის საგარეო საქმეთა მინისტრმა სოხუმში საელჩო გახსნა, ეს უმძიმესი დღეები მხოლოდ კომენტარებში არ უნდა ჩაიმალოს. ჩვენ ვიქეცით კომენტატორებად ფაქტების შემდეგ. თუმცა უფრო ნაკლებს ვსაუბრობთ მედიაში, ექსპერტთა დონეზე . უნდა ვისაუბროთ იმაზე, თუ რა შეიძლება იყოს კიდევ ის ძაფები, რომელიც გვაკავშირებს ან შეიძლება დაგვაკავშიროს ჩვენს ისტორიულ მიწა-წყალთან და ჩვენი ერთიანობის მომავალთან. სამწუხაროდ, დღეს არათუ საერთაშორისო დღის წესრიგი, არამედ ქართული პოლიტიკური დღის წესრიგიც არ არის მზად. ეზარებათ ან უჭირთ ამ ყველაფრისთვის თვალის გასწორება. მქონდა განცდა, რომ ბევრი აქტიური ნაბიჯი გადაიდგმებოდა, თუნდაც პოლიტიკური დეკლარაციების დონეზე. სამწუხაროდ, ესეც არ მოხდა. გუშინ კიდევ უფრო მძიმე განცხადება ვნახე “facebook”-ზე, ადა მარშანიამ გაავრცელა ინფორმაცია იმის შესახებ, რომ საქართველოს პარლამენტის კომისია ტერიტორიული მთლიანობის შესახებ, ჯერ კიდევ არ შეკრებილა და არ განუსაზღვრავთ სამუშაო სტრატეგია. სამწუხაროა, რომ ქართველობა შეეგუა არსებულ რეალობას, ეს უფრო მძიმეა ვიდრე სამშობლოს ნაწილების დაკარგვა. თუკი ფიქობენ რომ ესაა რთული საკითხი, რა თქმა უნდა ასეა, განსაკუთრებულად რთული საკითხია. მე ბევრჯერ მითქვამს და კიდევ მინდა გავიმეორო, ენგურის ხიდი მსოფლიოში ყველაზე გრძელი ხიდია და იგი უნდა გაიაროს ნებისმიერმა ქართველმა ადამიანმა, მიუხედავად მისი ჩინისა, ქონებისა თუ უქონელობისა. მრავალჯერ უნდა მოიწმინდოს ოფლი, რათა ერთხელაც აღდგეს ნდობა და საბოლოოდ სახელმწიფო გაერთიანდეს”,- განაცხადა ნესტან კირთაძემ “ჯი-ეიჩ-ენთან” საუბრისას.
