აშშ-ს ავიაციამ ავღანეთში ყველაზე დიდი არაბირთვული ბომბი ჩამოაგდო. იგი „ისლამური სახელმწიფოს“ გვირაბების გასანადგურებლად გამოიყენეს. თუმცა გაისმა მოსაზრებები, რომ ეს ნაბიჯი იყო ამერიკის მხრიდან ძალის დემონსტრირება მსოფლიოსთვის.
ამის შესახებ „ჯი-ეიჩ-ენი“ ექსპერტ გია ხუხაშვილს ესაუბრა. მისი თქმით, ბომბის ჩამოგდება იყო პიარზე გათვლილი ნაბიჯი და ღირებული შედეგი არ მოჰყოლია.
„რაც შეეხება აქციას ავღანეთში, შეიძლება ითქვას, რომ უდაოდ ესაა ძალის დემონსტრირება, რადგან პრაქტიკული შედეგი იყო მინიმალური და ძალიან მოკრძალებული, ისევე როგორც სირიაში განხორციელებული დარტყმის. შედეგი იყო მცირე, დაწყებული იქიდან, რომ რაკეტების 2/3 უბრალოდ ვერ მოარტყეს აეროდრომს და ვერც დიდი ნაწილი დააზიანეს. ფაქტია, რომ შეერთებული შტატები ამით ძალის დემონსტრირებას ახდენს, ცდილობს დაიბრუნოს ერთადერთი ზესახელმწიფოს როლი დედამიწაზე. ეს რითაა განპირობებული უკვე სხვა მიზეზებია, ერთ-ერთია შიდა პოლიტიკური. ტრამპის მიერ გამოცხადებულმა შიდა პრიორიტეტებმა მაინც და მაინც დიდი დინამიკა ვერ აკრიფა, ამიტომ გადაინაცვლა საგარეო პოლიტიკაზე, სადაც ამის დემონსტრირება ბევრად უფრო იოლია. რუსეთთან ურთიერთობაშიც რაღაც აქცენტები გაკეთდა.“- განაცხადა გია ხუხაშვილმა „ჯი-ეიჩ-ენთან“ საუბარში.