როდესაც პროცესს ბოიკოტს უცხადებ, შენ თვითონ რჩები პროცესების მიღმა, - ამის შესახებ პარლამენტის ვიცე-სპიკერმა ზვიად ძიძიგურმა საკონსტიტუციო კიმისიის მიმართ არასაპარლამენტო ოპოზიციის მიერ დაანონსებულ ბოიკოტთან დაკავშირებით განაცხადა.
“არა მგონია, ბოიკოტით ვინმემ რამე მოიგო. როდესაც პროცესს ბოიკოტს უცხადებ, შენ თვითონ რჩები პროცესების მიღმა. ეს არის ძალიან მწარე რეალობა, რომელშიც ბოიკოტისტი პარტიები აღმოჩნდებიან ხოლმე. ბოიკოტის არავის არ ეშინია. კონსტიტუცია იცვლება კარდინალურად და იცვლება უკეთესობისკენ. ეს იციან ჩვენმა ოპოზიციონერმა კოლეგებმა, ექსპერტებმა, აკადემიური წრეების წარმომადგენლებმა. საკითხების ულტიმატუმის ფორმით დაყენება მთლად ჭკვიანური საქციელი არ არის, რადგან ულტიმატუმის ენით ლაპარაკი არც საკონსტიტუციო კომისიაში და არც პოლიტიკურ პროცესებში ეფექტური არ გახლავთ”, - განაცხადა ძიძიგურმა.
არასაპარლამენტო ოპოზიციამ, შესაძლოა, საკონსტიტუციო კომისიის სხდომებს ბოიკოტი გამოუცხადოს. 15 კვალიფიციური სუბიექტების წარმომადგენლები, აღნიშნულ საკითხზე კონსულტაციების გასამართად კიდევ შეიკრიბნენ.
მათი განცხადებით, ბოიკოტი გარდაუვალია და ამის შესახებ საბოლოოდ გადაწყვეტილებას მომდევნო კვირაში მიიღებენ.
