„გირჩი“ მე-9 მოწვევის პარლამენტს მიმართავს, სწრაფი ეკონომიკური განვითარებისთვის აუცილებელი კონსტიტუციური გარანტიები შექმნას.
როგორც ახალი პოლიტიკური ცენტრის მიმართვშია ნათქვამი, როდესაც კონსტიტუციაში ცვლილებაზე ვსაუბრობთ, პირველ რიგში უნდა გვესმოდეს რა სჭირდება ყველაზე მეტად ქვეყანას უახლოეს მომავალში არსებული გამოწვევების გათვალისწინებით.
„კონსტიტუცია მნიშვნელოვანი დოკუმენტია, რომელიც განსაზღვრავს ქვეყნის განვითარების შესაძლებლობას და მის მომავალს, სწორედ ამიტომ, როდესაც ვსაუბრობთ კონსტიტუციაში ცვლილებაზე, პირველ რიგში უნდა გვესმოდეს რა სჭირდება ყველაზე მეტად ქვეყანას უახლოეს მომავალში არსებული გამოწვევების გათვალისწინებით, ისევე როგორც გრძელვადიან პერსპექტივაში, ძლიერ ევროპულ სახელმწიფოდ ჩამოყალიბებისათვის და რაზე არის შესაძლებელი კონსენსუსის მიღწევა მომავალ პარლამენტში გამომდინარე იმ დაპირებებიდან, რომლებიც გაცემული იქნა წინასაარჩევნოდ საკანონმდებლო ორგანოში გასული პოლიტიკური პარტიების მიერ. „გირჩი“ თვლის, რომ ქვეყნის წინაშე არსებული მთავარი გამოწვევა არის ეკონომიკის ზრდის დაბალი ტემპი. მთავარი მიზეზი, რომელიც ხელს გვიშლის სწრაფ განვითარებაში არის ეკონომიკური და პოლიტიკური გარემოს არასტაბილურობა. შესაბამისად, ჩვენი აზრით, უახლოეს პერიოდში, საშუალო და გრძელვადიან პერსპექტივაში ყველაზე მნიშვნელოვანი ორი საკითხი, რომელიც უკეთესად უნდა დარეგულირდეს საკონსტიტუციო დონეზე, არის პოლიტიკური სტაბილურობისა და სწრაფი ეკონომიკური განვითარებისთვის აუცილებელი კონსტიტუციური გარანტიები“, – ნათქვამია განცხადებაში.
„გირჩში“ მიიჩნევენ, რომ სწრაფი ეკონომიკური განვითარებისთვის მნიშვნელოვანია ეკონომიკური გარემოს სტაბილურობის საკონსტიტუციო ჩამკეტი მექანიზმების შექმნა.
„სწრაფი ეკონომიკური განვითარებისთვის მნიშვნელოვანია ეკონომიკური გარემოს სტაბილურობის საკონსტიტუციო ჩამკეტი მექანიზმების შექმნა: 1. ნაერთი ბიუჯეტის ხარჯებისა და არაფინანსური აქტივების ზრდის მთლიანი მოცულობის შეფარდება მთლიან შიდა პროდუქტთან არ უნდა აღემატებოდეს 15%-ს; 2020 წლისთვის ეს მაჩვენებელი უნდა შემცირდეს 22%-მდე, ხოლო 2024 წლისთვის 15%-მდე; 2. ნაერთი ბიუჯეტის დეფიციტი უნდა იყოს დაუშვებელი; 3. მთავრობის ვალის შეფარდება მთლიან შიდა პროდუქტთან არ უნდა აღემატებოდეს 15%-ს; 2020 წლისთვის ეს მაჩვენებელი უნდა შემცირდეს 30%-მდე, ხოლო 2024 წლისთვის 15%-მდე; 4. 2018 წლისთვის ქვეყანა უნდა გადავიდეს თავისუფალ სავალუტო რეჟიმზე; გადასახადების აკრეფა უნდა მოხდეს დოლარში“, – აცხადებენ „გირჩში“.