29 ნოემბერს, 16:00 საათზე, ქავთარაძის N1-ში მდებარე „გუდვილში" საწარმო „ერთად"-ის პროდუქციის სვანური მარილს „ზესხო"-ს პრეზენტაცია გაიმართება. ეკონომიკისა და მდგრადი განვითარების სამინისტროს ინფორმაციით, 2012 წლის 6 ივნისს ორგანიზაციამ „ხელმისაწვდომი გარემო ყველასთვის" თბილისის სახელმწიფო უნივერსიტეტის სტუდენტებთან ერთად შემუშავებული იდეით და მისი განხორციელების გეგმით გაიმარჯვა ევრაზიის თანამშრომლობის ფონდის მიერ მოწყობილ კონკურსში „სტუდენტები სოციალური მეწარმეობის მხარდასაჭერად".
გამარჯვებული პროექტის ფარგლებში დაარსდა სოციალური საწარმო „ერთად", რომელიც აწარმოებს სვანურ მარილს „ზესხო" და ასაქმებს შეზღუდული შესაძლებლობის მქონე ადამიანებს. მარილი მზადდება უნიკალური რეცეპტით და საწარმოს საფირმო საიდუმლოს წარმოადგენს. სოციალური საწარმოს მოგება ამ ეტაპზე რეინვესტირდება თავად საწარმოში. ეს შესაძლებლობას აძლევს საწარმოს მეტი შეზღუდული შესაძლებლობის მქონე ადამიანი დაასაქმოს, გაზარდოს წარმოება და შემოსავალი, რომელიც მთლიანად მოხმარდება შეზღუდული შესაძლებლობის მქონე ადამიანების სოციალურ ინტეგრაციას და ამ მიზნით დაგეგმილ აქტივობებს.
პრეზენტაციას დაესწრება ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი.
