გერმანიის უდიდეს ქალაქებში მოძრაობა Gen-Z Regelt-ის (Gen Z აგვარებს) მიერ ორგანიზებული ახალგაზრდული დემონსტრაციები გაიმართა.
ორგანიზატორების თქმით, საერთო ჯამში, საპროტესტო აქციები გერმანიის 30-ზე მეტ ქალაქში გაიმართა, რომელშიც 100 000-ზე მეტი ადამიანი მონაწილეობდა.
მომიტინგეების მოთხოვნები მოიცავს განათლების ხარისხის გაუმჯობესებას, ცხოვრების ხარჯების ზრდის წინააღმდეგ ბრძოლის ზომებს, კლიმატის დაცვის უფრო პროაქტიულ საკითხებს და ფსიქოთერაპიასა და დამოკიდებულების მკურნალობაზე ხელმისაწვდომობის გაუმჯობესებას. გარდა ამისა, პროტესტის ორგანიზატორები ეწინააღმდეგებიან სავალდებულო სამხედრო სამსახურის შესაძლო შემოღებას და სოციალური ხარჯების შემცირებას.
Deutsce Welle-ს ინფორმაციი, მაინის ფრანკფურტში მშვიდობიანი დემონსტრაციები, რომელშიც 8000-9000 ადამიანი მონაწილეობდა, ძარცვასა და პოლიციაზე თავდასხმებში, მათ შორის მოლოტოვის კოქტეილების გამოყენებაში გადაიზარდა. კერძოდ, აგრესიული მომიტინგეების ჯგუფმა მოახერხა იარაღის მაღაზიაში, ასევე Snipes-ის ტანსაცმლისა და სპორტული ფეხსაცმლის მაღაზიაში შეჭრა.
ჰესენის შინაგან საქმეთა მინისტრის, რომან პოზეკის თქმით, არეულობის უკან დემონსტრანტებს შორის „დაახლოებით 100 ძალადობრივი მემარცხენე ექსტრემისტი“ იდგა.
ბერლინში ორი მასშტაბური საპროტესტო აქციიდან ერთ-ერთი, რომელშიც დაახლოებით 3500 ადამიანი მონაწილეობდა, ძირითადად მემარცხენე რადიკალური დაჯგუფებების წევრები, არეულობაში გადაიზარდა. მომიტინგეებმა ფეიერვერკები გაისროლეს, რამდენიმე მათგანმა პოლიციელებს ბოთლები ესროლა. სამართალდამცავების ინფორმაციით, დაკავებულია 56 ადამიანი, 27 პოლიციელს მსუბუქი დაზიანება აქვს.
31 ოქტომბერს გერმანიაში გამართული საპროტესტო აქციები ახალგაზრდული საპროტესტო აქციების ტალღის ნაწილი იყო, რომელიც ბოლო კვირების განმავლობაში სხვა ევროპულ ქვეყნებშიც გავრცელდა, მათ შორის საფრანგეთში, სადაც სხვადასხვა ქალაქში საპროტესტო აქციები არეულობაში და პოლიციასთან შეტაკებაში გადაიზარდა, ასევე ბელგიაში.
სიტუაცია ასევე რთულია იტალიაში, სადაც, ორგანიზატორების თქმით, 30 ოქტომბერს გამართულ საპროტესტო აქციებში მილიონზე მეტმა ადამიანმა მიიღო მონაწილეობა. მანამდე, მილანში მომხდარი არეულობების შემდეგ, ქვეყნის ხელისუფლებამ წესრიგის დასაცავად ქალაქში 500 ჯარისკაცის განლაგების ბრძანება გასცა.
