კომპანიამ „ასკანელი ძმები" „როსპოტრებნადზორში" წარდგენილ ყველა განაცხადზე დადებითი პასუხი მიიღო. როგორც კომპანიის მენეჯმენტში აცხადებენ, მათ ხელთ აქვთ ყველა ის ნებართვა და სერთიფიკატი, რომელიც პროდუქციის რუსეთში გადასატვირთად არის საჭირო, მათ შორის ახლად მინიჭებული სერთიფიკატები კომპანიის წარმოებულ კონიაკებზე „ასკანელი" და „გიდელი".
„ასკანელი ძმების" აღნიშნული სასმელების რუსეთის ბაზარზე გაგზავნა, გაუგებრობის გამო მიმდინარე წლის მაისში შეფერხდა, რის გამოც ჩვენმა კომპანიამ პროდუქციის ხელმეორედ შემოწმება მოითხოვა. კონიაკებმა „ასკანელი" და „გიდელი" ხელახალი შემოწმების პროცესი წარმატებით გაიარეს."- აცხადებს „ასკანელი ძმების" დამფუძნებელი ჯიმი ჩხაიძე.
სერთიფიცირების პროცესი სამი თვის განმავლობაში მიმდინარეობდა და ე.წ „როსპოტრებნადზორის" დასტური „ასკანელი ძმების" მიერ წარმოდგენილმა ყველა კონიაკმა - „გიდელმა" და „ასკანელმა" 3, 5, 6 და 8 წლიანი დაძველებით მიიღო.
„გვიხარია, რომ გაუგებრობა ამოიწურა. მართალია, დიდი ზიანი მიადგა ჩვენი კომპანიის საქმიან იმიჯს, მაგრამ ვფიქრობ, რომ საბედნიეროდ ყველაფერი გაირკვა. „ასკანელი ძმების" პროდუქციის კიდევ რამდენიმე სახეობაზე მიღებული დასტური ჩვენთვის ძალიან სასიხარულო ფაქტია. კონიაკები „ასკანელი" და „გიდელი" რუსეთში ექსპორტზე უახლოეს დღეებში გაიგზავნება." - აცხადებს ჯიმი ჩხაიძე.
„ასკანელი ძმების" პროდუქცია რუსეთის ბაზარზე უკვე სამი თვეა წარმატებით და შეუფერხებლად იგზავნება. ივნისის შემდეგ კომპანიამ რუსეთის ფედერაციაში მილიონ ბოთლზე მეტი ღვინო გაიტანა.
„უნდა აღინიშნოს, რომ „ასკანელი ძმები" ერთადერთი ქართული კომპანიაა, რომელიც რუსეთის უმსხვილეს სარესტორნო ქსელს „გინზა გრუპ"-ს საკუთარ პროდუქციას აწვდის. ბრენდის ექსპორტირებულ მრავალფეროვან პროდუქციას ამჯერად კონიაკები „ასკანელი" და „გიდელი" შეემატება. სამომავლოდ კი სერთიფიცირებისთვის კონიაკების - XO, VSOP, VS წარდგენას ვგეგმავთ."-განაცხადა ჯიმი ჩხაიძემ.
რუსეთის ბაზარზე ამ დროისთვის „ასკანელი ძმების" ცხრა დასახელების ღვინო გადის. „ქინძმარაული", „წინანდალი", „ალაზნის ველი - წითელი", „ალაზნის ველი-თეთრი", „ხვანჭკარა", „საფერავი", „მუკუზანი", „ახაშენი" და „ოჯალეში" - ეს იმ ღვინის სახეობებია, რომელის რეალიზებასაც რუსეთის უმსხვილესი სუპერმარკეტების ქსელი „მაგნიტი" ფედერაციის მთელი მასშტაბით ახორციელებს. ასევე ასკანელი ძმების პროდუქციის დისტრიბუცია რუსეთში ისეთ დიდ ქსელებში და ჰიპერმარკეტებში ხორციელდება როგორებიცაა „X 5", „კოპეიკა", „პერეკრესტოკი", „კარუსელი" და სხვა.
რაც შეეხება „ასკანელი ძმების" სხვა სიახლეებს, ჯიმი ჩხაიძის ინფორმაციით, კომპანია დინამიურად ვითარდება, შენდება ახალი საწარმო, რომელიც აღჭურვილი იქნება იტალიური ტექნიკა-დანადგარებით. გაორმაგებული სიმძლავრის მქონე ქარხნის მშენებლობა ISO სტანდარტების დაცვით მიმდინარეობს და 6 თვეში დასრულდება.
კომპანია „ასკანელი ძმები" 15 წლის წინ დაარსდა და სადღეისოდ ერთ-ერთი წამყვანი კომპანიაა ქართულ ალკოჰოლის მწარმოებელ კომპანიებს შორის. კომპანია აწარმოებს 8 სახეობის კონიაკს, 32 დასახელების ღვინოს, 4 დასახელების ჭაჭას. „ასკანელი ძმების პროდუქცია" აღიარებულია საუკეთესოდ და მინიჭებული აქვს 100-ზე მეტი ჯილდო, სხვადასხვა გამოფენებსა და დეგუსტაციებზე. „ასკანელი ძმების" მიერ წარმოებული სასმელები გადის ექსპორტზე 19 ქვეყანაში, მათ შორის აშშ-ში, უკრაინაში, ჩინეთში, გერმანიაში, დიდ ბრიტანეთში, ესტონეთში, ლიტვაში, ლატვიაში, პოლონეთში, ჩეხეთში, ყაზახეთში, ფინეთში, აზერბაიჯანში და ბელორუსიაში.
