დღეს, 16 სექტემბერს, გარემოსა და ბუნებრივი რესურსების დაცვის სამინისტროში ოზონის შრის დაცვის საერთაშორისო დღისადმი მიძღვნილი ღონისძიება გაიმართება.
გარემოს დაცვისა და ბუნებრივი რესურსების დაცვის სამინისტროს ინფორმაციით, ღონისძიებას გარემოსა და ბუნებრივი რესურსების დაცვის მინისტრი ხათუნა გოგალაძე, ფინანსთა მინისტრი ნოდარ ხადური, გაერო-ს განვითარების პროგრამის (UNDP) წარმომადგენელი ინიტა პაულოვიჩა და სსიპ შემოსავლების სამსახურის საბაჟო დეპარტამენტის უფროსი ვლადიმერ ხუნდაძე დაესწრებიან.
ღონისძიების ფარგლებში გარემოსა და ბუნებრივი რესურსების დაცვის სამინისტრო და გაეროს განვითარების პროგრამა ფინანსთა სამინისტროს სსიპ შემოსავლების სამსახურის საბაჟო დეპარტამენტს გადასცემს ოზონდამშლელი ნივთიერებების იდენტიფიკატორს, რომელიც "მონრეალის ვალდებულებათა განხორციელების ხელშეწყობის პროექტის" ფარგლებში ოზონდამშლელი ნივთიერებების ექსპორტ-იმპორტის კონტროლის მიზნით არის შეძენილი.
საქართველო ვენის კონვენციას და მონრეალის ოქმს 1996 წელს შეუერთდა და ოზონდამშლელი ნივთიერებების მოხმარებიდან ეტაპობრივად ამოღების ვალდებულება იკისრა.
