მალე ქართული ციტრუსი ახალი ტექნოლოგიებით დახარისხდება და დაფასოვდება. აჭარის სოფლის მეურნეობის მინისტრის ზაურ ფუტკარაძის განმარტებით, რეგიონში ციტრუსის სეზონისთვის მზადება უკვე დაიწყო და 1-ელ ნოემბრამდე ექსპლუატაციაში რამდენიმე ახალი საწარმო შევა. მინისტრის თქმით, რეგიონის მთავრობამ ქვეყნის ეკონომიკის სამინისტროსთან მოლაპარაკებები უკვე აწარმოა და უახლოეს დღეებში, დამატებით ახალი საწარმოების შექმნაზე ინტერესთა მიღება გამოცხადდება. აღსანიშნავია, რომ ახალ საწარმოებში 1 საათში 5-10 ტონა ციტრუსის დახარისხება/დაფასოება იქნება შესაძლებელი და მოთხოვნის შემთხვევაში შესაძლებლობა იქნება, რომ ექსპორტიორს ნებისმიერი რაოდენობის დახარისხებული პროდუქცია უმალვე მიეწოდოს.
მინისტრის განმარტებით, გარდა დამაფასოებელ/დამახარისხებელი საწარმოებისა, ციტრუსის სეზონისთვის უკვე ემზადებიან რეგიონში უკვე არსებული საწარმოები.
ზაურ ფუტკარაძის განმარტებით, სამინისტროს უკვე ქონდა შეხვედრები ქობულეთის გადამამუშავებელი საწარმოს ადმინისტრაციასთან და როგორც „ქობულეთის აქტივების მართვის ჯგუფში" განმარტავენ, წელს ისინი 1 კგ. არასტანდარტულ ციტრუსს საშუალოდ 14-15 თეთრად ჩაიბარებენ, მაშინ როდესაც გასულ წელს არასტანდარტული ციტრუსის ჩაბარება 12 თეთრის ფარგლებში მოხდა. „ქობულეთის აქტივების მართვის ჯგუფში" მზადაა წელს 15 ათასი ტონა არასტანდარტული ციტრუსი ჩაიბაროს, ეს იმ ფონზე, როდესაც გასულ წელს გურიისა და აჭარის მასშტაბით, საწარმოებმა სულ 10 ათასი ტონა ციტრუსი ჩაიბარეს. თუმც როგორც აჭარის სოფლის მეურნეობის მინისტრი აცხადებს, წინასწარ ციტრუსის ფასის პროგნოზირება ძნელია და საბოლოო ფასი დაახლოებით სექტემბერში დაკორექტირდება.
წელს ციტრუსს ჩაიბარებს კომპანია „ციტროც", თუმცა არსებული სიმძლავრეებიდან გამომდინარე, კომპანია დიდი მასშტაბით ციტრუსის მიღებას ვერ მოახერხებს.
ხოლო რაც შეეხება ბაზრის კიდევ ერთ მოთამაშეს- „ნარინჯს", ის წელს ციტრუსის ჩაბარებასა და გადამუშავებას აღარ აპირებს, რადგან საწარმო მუშაობას მალე მრეწველობის სხვა სექტორში გააგრძელებს. საწარმოს ახალი მფლობელი ყავს და მის ახალ მეპატრონეს უფრო მომგებიანად ავეჯის წარმოება მიაჩნია.