შსს-ში ფარულ ჩანაწერებთან დაკავშირებით შექმნილი კომისიის საგანგებო სხდომა მიმდინარეობსს. შეხვედრის გადაწყვეტილება შს მინისტრმა ირაკლი ღარიბაშვილმა გვიან ღამით მიიღო. როგორც შეხვედრის დაწყებამდე კომისიის წევრებმა ჟურნალისტებთან განაცხადეს მათთვის უცნობია შეხვედრის მიზანი, რადგან რამდენიმე დღის წინ კომისიამ უკვე მიიღო გადაწყვეტილება პირადი ცხოვრების ამსახველი ვიდეომასალის განადგურების თაობაზე.
,,დღევანდელი შეხვედრის მიზანი არ ვიცი რა არის, რადგან გუშინ გვიან ღამით გადაწყდა შეხვედრა. შესაბამისად შევალთ და გავიგებთ რაშია საქმე", -განაცხადა ჟურნალისტებთან ,,საერთაშორისო გამჭვირვალობა საქართველოს" თავმჯდომარემ ეკა გიგაურმა, რომელმაც კიდევ ერთხელ დაადასტურა, რომ პირადი ცხოვრების ამსახველი მასალები უნდა განადგურდეს.
შეგახსენებთ, რომ რამდენიმე დღის წინ კომისიამ მიიღო გადაწყვეტილება, რომ პირადი ცხოვრების ამსახველი ვიდეომასალები კვირას, 23 ივნისს 15: 00 საათზე განადგურდეს.
