"ერთიანი ნაციონალური მოძრაობა" უნივერსიტეტების ავტონომიის შესაძლო შეზღუდვასთან სდაკავშირებით განცხადებას ავრცელებენ. განცხადებაში აღნიშნულია, რომ „ერთიანი ნაციონალური მოძრაობა" გამოთქვამს უკიდურეს შეშფოთებას უმაღლესი განათლების შესახებ საქართველოს კანონში მთავრობის მიერ ინიცირებულ ცვლილებებთან დაკავშირებით.
„პრემიერ-მინიტრი მოითხოვს სახელმწიფო უნივერსიტეტების რექტორის მოვალეობის შემსრულებლის დანიშვნის ექსკლუზიურ უფლებამოსილებას რითაც, ფაქტიურად, სრულიად უქმდება სახელმწიფო უმაღლესი სასწავლებლების ავტონომია.
ამასთან, ცვლილებების პაკეტით, დოქტორანტებს ერთმევათ შესაძლებლობა დაიკავონ ასისტენტ-პროფესორის თანამდებობა. შედეგად, ასეულობით კვალიფიცირებული ახალგაზრდა მეცნიერსა და მკვლევარს მოუწევს პედაგოგიური საქმიანობის მნიშვნელოვნად შეზღუდვა. შეწყდება მრავალი აკადემიური პროგრამა, რაც მნიშვნელოვან ზიანს მიაყენებს საგანმანათლებლო პროცესს"- ნათქვამია განცხადებაში.
პარტიაში განმარტავენ, რომ აშკარაა რომ ეს საკანონმდებლო ინიციატივა ნაკარნახევია პრემიერ-მინისტრ ბიძინა ივანიშვილის სურვილით დაამყაროს პოლიტიკური კონტროლი აკადემიურ სფეროზე.
„შემოთავაზებული პაკეტით ქართული ოცნება აკანონებს საკუთარი ლიდერების მიერ არაერთხელ ჩამოყალიბებულ პოლიტიკურ ხაზს, რომლის თანახმადაც 2004 წლიდან არჩეული არც ერთი აკადემიური საბჭო თუ პროფესორი არ არის ლეგიტიმური. აშკარაა, რომ „ქართული ოცნების" საკანონმდებლო ინიციატივები და პოლიტიკა ქმნის კლიმატს რომელიც საქართველოს უმაღლესი განათლების სისტემას აბრუნებს შევარდნაძის და როინ მეტრეველის ეპოქაში.
აღსანიშნავია რომ 2004 წლიდან გატარებული კომპლექსური მაგრამ არასაკმარისი რეფორმების შედეგად დაიძლია სისტემისთვის დამახასიათებელი ღრმად ფესვგადგმული პრობლემები როგორებიც იყო კორუფცია და მექრთამეობა (მსოფლიო ბანკის 2001 წლის კვლევის თანახმად, უმაღლეს სასწავლებლების მისაღებ გამოცდებზე ქრთამის წლიური ბრუნვა შეადგენდა 40 მილიონ აშშ დოლარს), რეპეტიტორობა, დიპლომებით ვაჭერობა, პლაგიატიზმი და ზოგადად უხარისხო, არაკონკურენტუნარიანი განათლება. ბოლო წლების განმავლობაში საქართველოს სახელმწიფო უმაღლესმა სასწავლებლებმა მსოფლიო რეიტინგებში დაახ. 2,000 ადგილით გაიუმჯობესეს მდგომარეობა"- აცხადებს „ნაციონალური მოძრაობა".