აშშ-ის პრეზიდენტმა დონალდ ტრამპმა განაცხადა, რომ ირანთან დაკავშირებით მისთვის ყველაზე დიდი პრობლემა ის არის, რომ არავინ იცის, ვინ მართავს ქვეყანას.
ტრამპმა ამის შესახებ მერილენდში გამართულ ღონისძიებაზე განაცხადა.
ტრამპის თქმით, ირანის ლიდერები აღარ არსებობენ, ლიდერთა მეორე ჯგუფიც აღარ არსებობს და გაურკვეველია, ვინ იღებს ქვეყანაში გადაწყვეტილებებს.
„მათი ეკონომიკა განადგურებულია. მათ აქვთ ინფლაცია, როგორც მსოფლიოს არცერთ სხვა ქვეყანაშია და ერთმა კაცმა, რომელმაც ირანი რამდენიმე დღის წინ დატოვა, თქვა: „მე მივდივარ, რადგან ჩვენი ქვეყანა დამთავრდა“. ეს არის ის, რაც მან თქვა. ეს თავისთავად არ ხდება. ამერიკის შეიარაღებული ძალების მამაკაცებისა და ქალების წყალობით, ირანის ათობით ტერორისტი ლიდერი განადგურებულია და ისინი პირდაპირ ჯოჯოხეთის კარიბჭეში გადააგდეს. როგორც იცით, მათი ლიდერები აღარ არსებობენ. მათი ლიდერების მეორე ჯგუფიც აღარ არსებობს. ყველაზე დიდი პრობლემა ის არის, რომ არავინ იცის, ვინ მართავს ქვეყანას ახლა. არავინ იცის. მაგრამ შესაძლოა ეს კარგიც იყოს“, – განაცხადა ტრამპმა.
ტრამპის განცხადებას ირანის საგარეო საქმეთა სამინისტროს სპიკერი ესმაილ ბაღაი გამოეხმაურა. მისი თქმით, ვაშინგტონმა ძალიან კარგად იცის, ვინ არის მისი პარტნიორი ირანში და როგორ მუშაობს ქვეყნის გადაწყვეტილების მიღების სისტემა. ბაღაის განცხადებით, პრობლემა, პირიქით, აშშ-ის ოფიციალური პირების ურთიერთგამომრიცხავ პოზიციებსა და არაერთგვაროვან გზავნილებშია.
Reuters-ის ცნობით, განცხადება აშშ-ისა და ისრაელის მიერ ირანთან მიმდინარე ომის მერვე თვის ფონზე გაკეთდა.
