საქართველო პრემიერმინისტრი ბიძინა ივანიშვილი ვიდეომიმართვას ავრცელებს, რომელშიც გუშინ, 6 ივნისს, ავღანეთში ქართულ ბაზაზე მომხდარი ტერორისტული თავდასხმის გამო მწუხარებას გამოთქვამს და დაღუპული სამხედროების ოჯახის წევრებსა და ახლობლებს უსამძიმრებს.
პრემიერის თქმით, თავზარდამცემი ტრაგედიის მიუხედავად, საქართველო უკან არ დაიხევს. ივანიშვილი აცხადებს, რომ საქართველომ უდიდესი მსხვერპლი გაიღო საერთაშორისო უსაფრთხოებისთვის ბრძოლაში და ეს მთელმა მსოფლიომ იცის.
,,უდიდესი მწუხარება მინდა გამოვთქვა ამ შემზარავი ტრაგედიის გამო. ქედს ვიხრი ჩვენი დაღუპული გმირების წინაშე. სამძიმარს ვუცხადებ და თანავუგრძნობ მთელს საქართველოს. ვიზიარებ თითოეული ჯარისკაცის ოჯახისა და ახლობლების უდიდეს ტკივილს. ტკივილს, რომელსაც ვერაფერი გაანელებს. მათთან ერთად გლოვობს მთელი საქართველო. ჩვენმა ქვეყანამ უდიდესი მსხვერპლი გაიღო საერთაშორისო უსაფრთხოებისთვის ბრძოლაში და ეს იცის მთელმა მსოფლიომ. ჩვენმა ძმებმა, ჩვენმა შვილებმა სიცოცხლე შესწირეს ბრძოლას მშვიდობიანი მსოფლიოსათვის, ბრძოლას ტერორიზმის წინააღმდეგ. ტერორიზმს კი ეროვნება და საზღვრები არ აქვს. ეს 21-ე საუკუნის უდიდესი გამოწვევაა. ტერორიზმთან ბრძოლა ურთულესი და ამავე დროს მეტად საპატიო მისიაა, რომელსაც საერთაშორისო სამშვიდობო ძალებთან ერთად გმირი ქართველი სამხედროები ღირსეულად ასრულებენ", _განაცხადა ბიძინა ივანიშვილმა და აღნიშნა, რომ მომხდარი ტრაგედიის მიუხედავად საქართველოს და ქართველებს ვერაფერი გატეხავს.
ივანიშვილის განცხდებით, საქართველო უკან არ დაიხევს და ბრძოლას გააგრძელებს მშვიდობისთვის.