,,არ ველოდი ასე საჯაროდ თუ დააფიქსირებდა ამ პოზიციას პრემიერ-მინისტრი", - განაცხადა ,,ჯი-ეიჩ-ენთან" საუბარში ,,ყოფილი პოლიტპატიმრები ადამიანის უფლებებისთვის" ხელმძღვანელმა ნანა კაკაბაძემ ბიძინა ივანიშვილის განაცხადების კომენტირებისას.
,,ძალიან ვწუხვარ, რომ ბიძინა ივანიშვილს 19 აპრილის აქცია არ მოეწონა. კომუნისტური რეჟიმიდან დაწყებული მიჩვეული ვარ, რომ თითქმის ყველა ხელისუფლებას არ მოვწონვარ. ბუნებრივია, არც ერთ ხელისუფლებას არ მოსწონს როცა აკრიტიკებ და სთხოვ დანაპირების შესრულებას, მაგრამ არ ველოდი ასე საჯაროდ თუ დააფიქსირებდა ამ პოზიციას პრემიერ-მინისტრი", _ განაცხადა კაკაბაძემ.
მისივე თქმით, საზოგადოების მოვალეობაა აკონტროლოს ხელისუფლება.
,,ჩვენ იმისთვის გვინდოდა თავისუფალი და დემოკრატიული ქვეყანა, რომ ხელისუფლებას უნდა ჰქონდეს თმენის ვალდებულება და მოითმინოს, რაც არ მოსწონს. Aამავე დროს საზოგადოება მოწოდებულია იმისთვის, რომ ხელისუფლებას შეახსენოს ის ვალდებულებები რომელიც მას გააჩნია ხალხისა და ქვეყნის წინაშე", -განაცხადა ნანა კაკაბაძემ ,,ჯი-ეიჩ-ენთან" საუბარში.
მისივე განაცხადებით, 19 მაისის აქციით ხალხმა ხელისუფლებას ის დანაპირები შეხსენა, რომელიც მან წინასაარჩევნო დადო, რომ აღადგენდა სამართლიანობას.
,,ხელისუფლების ფუნქციაა დაიცვას ადამიანის უფლებები, ხოლო საზოგადოების მოვალეობაა, როცა ხელისუფლება ვერ, ან არ იცავს ამ უფლებებს, შევახსენოთ თავისი ფუნქცია", _განაცხადა კაკაბაძემ.
შეგახსენებთ, რომ საქართველოს პრემიერ-მინისტრის ბიძინა ივანიშვილის განცხადებით, მას არ მოეწონა 19 მაისს სპორტის სასახლეში სამართლიანობის აღდგენის მოთხოვნით უფლებადამცველთა გაერთიანება „ყოფილი პოლიტპატიმრები - ადამიანის უფლებებისათვის" მიერ ორგანიზებული აქცია". ამის შესახებ პრემიერმა „პრაიმ-ტაიმთან" ინტერვიუში განაცხადა. მისი თქმით, რაღაც ძალებს უნდათ, სახელმწიფოს ფუნქცია შეასრულონ და ნაწილობრივ მაინც ჩაენაცვლონ". „ნებისმიერი ქუჩაში გამოსვლა, როგორც წესი ხელისუფლებას მიანიშნებს რომ ხალხს რაღაც არ მოსწონს. ვფიქრობ, რომ მაქსიმალურად გამჭვირვალე ხელისუფლებაა დღეს. ჩემი აზრით, ძალიან ბევრი ვერ ახერხებს ობიექტურად გააანალიზოს სიტუაცია, ვიღაცას კიდევ უნდა რომ საკუთარი თავი წარმოაჩინოს ზედმეტად. დემოკრატიული სახელმწიფო იმისაა რომ ყველას ჰქონდეს აზრის გამოხატვის საშუალება", - განაცხადა ბიძინა ივანიშვილმა.