ადვოკატებთან ერთად დავამტკიცებ ჩემს უდანაშაულობას, - ამის შესახებ "ნაციონალური მოძრაობის" გენერალურმა მდივანმა ვანო მერაბიშვილმა დღევანდელ სასამართლო პროცესზე სიტყვით გამოსვლისას განაცხადა. მისი თქმით, ის ამაყია, რადგან პირველი პრემიერ-მინისტრია, რომელიც დაკავებულია.
„ვამაყობ, რომ ვარ პირველი პრემიერ-მინისტრი, ვინც დაკავებულია. ეს არის კანონზომიერი. ადვოკატებთან ერთად დავამტკიცებ ჩემს უდანაშაულობას, მაქვს დამოუკიდებელი სასამართლოს იმედი", - განაცხადა ვანო მერაბიშვილმა და აღნიშნა, რომ კარგია, რომ თავად არის დაპატიმრებული და მის თანამებრძოლებზე ზეწოლა აღარ მოხდება.
,,შემთხვევითი არ არის ჩემი პატიმრობა მაშინ, როცა ჩემს მიერ დაჭერილი ყველა კანონიერი ქურდი, ყაჩაღი და რუსეთის ჯაშუში გათავისუფლებულია ამ რეჟიმის მიერ. ამ ფონზე ლოგიკურია, რომ მე, როგორც მათთან მებრძოლი, ვიჯდე ციხეში", - აღნიშნა მერაბიშვილმა.