დავით ებრალიძის მიერ საქართველოს ფინანსთა მინისტრის მოადგილის თანამდებობიდან წასვლის შესახებ განცხადებასთან დაკავშირებით, სამინისტრო განმარტებას აკეთებს.
"სამწუხაროდ, დავით ებრალიძემ სამუშაო პროცესში გამოთქმული ალტერნატიული მოსაზრებები ჩათვალა მისი პრინციპული მოსაზრებების საწინააღმდეგოდ და მიიღო გადაწყვეტილება თანამდებობიდან წასვლის შესახებ.
საქართველოს ფინანსთა მინისტრი დაეთანხმა მის პირად განცხადებას გათავისუფლების შესახებ და კანონმდებლობის შესაბამისად, მისი განცხადება გაეგზავნა საქართველოს პრემიერ-მინისტრს ბიძინა ივანიშვილს.
დავით ებრალიძე, როგორც მინისტრის მოადგილე - საპარლამენტო მდივანი, კურირებდა საგადასახადო პოლიტიკის მიმართულებას და იყო დავების განხილვის საბჭოს თავმჯდომარის მოადგილე.
საქართველოს ფინანსთა სამინისტრო აცხადებს, რომ რეფორმების მიმდინარეობა არ არის დამოკიდებული ერთ რომელიმე, თუნდაც, მაღალი რანგის თანამდებობის პირზე. რეფორმები არის საქართველოს მთავრობის საქმიანობის ძირითადი კურსი და სამინისტროში, ისე როგორც ყველა სხვა მიმართულებით, გაგრძელდება რეფორმები, რომელიც ითვალისწინებს საგადასახადო კანონმდებლობის შემდგომ ლიბერალიზაციას და დახვეწას, ასევე, დავების განხილვის საბჭოს ეფექტიანი მუშაობის უზრუნველყოფას, რათა ხელი შეუწყოს საინვესტიციო გარემოს სრულყოფას და გადამხდელთა უფლებების დაცვას", -ნათქვამია ფინანსთა სამინიტროს განცხადებაში.
