ბიზნესომბუდსმენი ფინანსთა სამინისტროს მიერ მიღებულ გადაწყვეტილებას, რომლის მიხედვითაც გარკვეულ გადაზიდვებზე „საქართველოს ფოსტას" პრივილეგიები უუქმდება, სკეპტიკურად უყურებს. როგორც გიორგი გახარიამ, დღეს რადიო „კომერსანტის" ბიზნესპრესკლუბში სტუმრობისას განაცხადა, ბოლო გადაწყვეტილებით ფინანსთა სამინისტრომ ფაქტობრივად აღიარა, რომ იანვარში გამოცემული ბრძანებულება არსებულ კანონმდებლობასთან შესაბამისობაში არ მოდიოდა და ზოგადად გადაწყვეტილებაში გარკვეული ხარვეზები იყო. გიორგი გახარია განმარტავს, რომ გაუგებარია თუ რატომ გადადო ფინანსთა სამინისტრომ უკვე მიღებული გადაწყვეტილების აღსრულება 8 თვის შემდგომ, რადგანაც ამ პერიოდში ამ ბაზარზე მომუშავე კომპანიებს სერიოზული პრობლემები მოელით.
„აღნიშნულ საკითხის დარეგულირებაში ჩართულნი ვიყავით საკმაოდ აქტიურად. მინდა გითხრათ, რომ ეს იყო პირველი სერიოზული საქმე, რომელშიც ჩვენ - ბიზნესომბუდსმენის ინსტიტუტი ჩავერთეთ. ერთის მხრივ, ფინანსთა სამინისტრომ ბოლო გადაწყვეტილებით, რომ გააუქმოს მისივე წინა ბრძანება და მისი აღსრულება დაიწყოს 8 თვის შემდგომ, ამით მან ფაქტობრივად აღიარა ის ფაქტი, რომ ბრძანება ასე თუ ისე არ შეესაბამებოდა შესაბამის კანონმდებლობას და ასევე მასში არის გარკვეული ხარვეზები.
მეორეს მხრივ, ბრძანების გაუქმება გადაიდო 8 თვით, ფაქტობრივად ყოველგვარი განმარტების გარეშე. რატომ არა დღეს და რატომ 8 თვის შემდეგ?! ჩემთვის გაუგებარია რა შეიცვლება 8 თვის შემდეგ, ის მოტივაცია, რომელიც აშკარა არაა, მაგრამ სავარაუდოდ სამინისტროს გააჩნია, დარწმუნებული არ ვარ, რომ 8 თვის შემდგომაც შეიცვლება"- აცხადებს ბიზნესომბუდსმენი.
მისივე განმარტებით, „საქართველოს ფოსტას" შექმნილი აქვს ისეთი პირობები, რომ ის გარკვეულ სეგმენტში მონოპოლისტია.
„გასაგებია, რომ „საქართველოს ფოსტას" შეექმნა, ან შექმნილი ქონდა გარკვეული სასათბურე პირობები, მაგრამ არ შეიძლება ითქვას, რომ ფოსტა არის 100 %-იანი მონოპოლისტი. აქ საუბარია გარკვეულ სეგმენტზე. კონკრეტულად საქმე ეხება გადაზიდვებს მაღალრისკიანი ქვეყნებიდან. ფინანსთა სამინისტროს წინა ბრძანებულებით ამ სეგმენტში „საქართველოს ფოსტა" ფაქტობრივად გახდა მონოპოლისტი"- აცხადებს გიორგი გახარია.
ბიზნესუმბუდსმენი აცხადებს, რომ გადამზიდავი კომპანიები სახელმწიფოს მხრიდან ფაქტობრივად 8 თვით მოტყუებულნი დარჩნენ.
„ვიდრე ფინანსთა სამინისტრო საბოლოო გადაწყვეტილებას მიიღებდა, რამდენიმე გადამზიდავ კომპანიას ქონდა იმედი და მათ დაპირდნენ კიდეც, რომ მათ სპეცდეკლარირების პროგრამა უნდა შეემუშავებინათ და ამის შემდგომ მათ საერთო სერვერზე მიაერთებდნენ. ყველა ამ კომპანიამ ეს პროგრამა შეიმუშავა და იმედიც ქონდათ შესაბამის სერვერზე მიერთების და უცებ გამოდის ბრძანება, რომ ეს ყველაფერი 8 თვით გადადებულია. მე მიმაჩნია, რომ ეს ფორმა არის არასწორი"- ამბობს გიორგი გახარია.
ბიზნესომბუდსმენი აცხადებს, რომ არსებული ხარვეზის გამოსწორება 8 თვის შემდგომ დაგვიანებული იქნება და რომ ამ პერიოდში ბაზარზე არსებული სხვა კომპანიები შესაძლოა გაკოტრდნენ და ბაზრიდან გავიდნენ.
„ამ გადამზიდავებს პრობლემები დღეს უკვე შექმნილი აქვთ და მათ იმედი ქონდათ, რომ პრობლემების გადაწყვეტა უახლოეს პერიოდში მოხდებოდა. ახალი გადაწყვეტილება კი უქმნის რისკს ამ გადამზიდავების ბიზნესს. 8 თვის შემდეგ კი ამ კომპანიების ხელახალი ამუშავება შესაძლებელი იქნება, მაგრამ ეს დამატებით ხარჯებთან იქნება დაკავშირებული. როდესაც ვაღიარებთ, რომ ამ ბრძანებას ვაუქმებთ 8 თვის შემდეგ, ისმის კითხვა - ის ხარჯები და დანაკარგები, რომელსაც ეს კომპანიები თუნდაც ამ 8 თვის განმავლობაში მიიღებენ ვინ აუნაზღაურებს მათ ამ ზარალს. ვთქვათ ამ კომპანიებმა გადაწყვიტეს სასამართლოს მიმართონ. საინტერესოა ვინ აუნაზღაურებს მათ ამ თანხებს?"- განმარტავს გიორგი გახარია.
შეგახსენებთ, რომ ფინანსთა მინისტრის გადაწყვეტილებით, იანვარში მიღებული რეგულაციები, რომელთა აღსრულების შედეგად მნიშვნელოვანი პრობლემები შეექმნათ ადგილობრივ მცირე და საშუალო გადამზიდველებს და უპირატეს მდგომარეობაში იქნა ჩაყენებული „საქართველოს ფოსტა", გაუქმდა. თუმცა რეალურად აღნიშნული რეგულაციის გაუქმება ხდება არა მყისიერად, არამედ ის ძალაში შევა 2014 წლის 1-ლი იანვრიდან.
