რუსები დღე და ღამე აგრძელებენ უკრაინის სამოქალაქო ინფრასტრუქტურის დაბომბვას, რადგან ზეწოლას არ გრძნობენ და ვიდრე რუსეთი მძიმე დანაკარგებს არ იგრძნობს, ის თავს აარიდებს რეალურ დიპლომატიას და ომის დასრულებას. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
„ერთადერთი მიზეზი, თუ რატომ აძლევს რუსეთი თავს ამის უფლებას, არის ის, რომ მისთვის ეს მტკივნეული არ არის. ვიდრე რუსეთი არ იგრძნობს თავის ძლიერ დანაკარგებს, და უპირველეს ყოვლისა, ეკონომიკურ დანაკარგებს, ის თავს აარიდებს რეალურ დიპლომატიას და ომის დასრულებას.
მნიშვნელოვანია, რომ მსოფლიომ ყველა დარტყმაზე რეაგირება მოახდინოს. მნიშვნელოვანია, რომ ევროპამ, შეერთებულმა შტატებმა, „დიდი შვიდეულის“ და „დიდი ოცეულის“ ქვეყნებმა რუსეთს დრო არ მისცენ - დრო ომისთვის.
საჭიროა მკაცრი სანქციები. საჭიროა მკაცრი ტარიფები რუსულ ვაჭრობაზე. საჭიროა სიცოცხლის ძლიერი დაცვა“, - წერს ზელენსკი.
მან აღნიშნა, რომ ღამით რუსებმა დაბომბეს ზაპოროჟიე, დილით კი - კიევის ოლქში მდებარე სამოქალაქო ლოჯისტიკური ცენტრი.
„არანაირი სამხედრო დანიშნულენა არ აქვს. ეს არის მიზანმიმართული რუსული თავდასხმა უკრაინულ მეწარმეობაზე“, - თქვა პრეზიდენტმა.
გარდა ამისა, დღის განმავლობაში რუსეთის ფედერაციამ ხარკოვის ფარმაცევტული უნივერსიტეტის შენობებს შეუტია.
„რუსეთის მიერ სუმის, ხარკივისა და დონეცკის ოლქების დასახლებებზე რუსული მუდმივი საჰაერო თავდასხმები გრძელდება. ისინი ზაპოროჟიეს რეგიონს FPV დრონებით ბომბავენ. ხერსონი გამუდმებით იბომბება“, - თქვა ზელენსკიმ.
