„საერთაშორისო ინვესტიციების საკოორდინაციო ცენტრი" „შრომის კოდექსში" შესატან ცვლილებებთან დაკავშირებით უკვე არსებულ კრიტიკას უერთდება. როგორც ცენტრის მიერ გავრცელებულ განცხადებაშია აღნიშნული, „საერთაშორისო ინვესტიციების საკოორდინაციო ცენტრის" ექსპერტები უერთდებიან იმ კრიტიკის დიდ ნაწილს, რაც ბოლო პერიოდში „შრომის კოდექსის" ცვლილებებთან დაკავშირებით გამოითქვა.
„ვფიქრობთ, რომ ცვლილებები ძალზე გაართულებს დამსაქმებელსა და დასაქმებულს შორის ურთიერთობას, რაც შესაბამისად გახდება ქვეყანაში ინვესტიციების მოზიდვის და ახალი სამუშაო ადგილების შექმნისათვის სერიოზული დამაბრკოლებელი გარემოება.პირველ რიგში აღვნიშნავთ, რომ ცვლილებების მომზადებისას არ არის გათვალისწინებული ქართული შრომის ბაზრის სპეციფიკა.
კერძოდ, არ არის გათვალისწინებული ის, რომ ჯერ-ჯერობით საქართველოში სამუშაო ადგილების უმეტესობას ქმნის მომსახურების სფერო და არა წარმოება. მომსახურების სფეროს სპეციფიკა მოითხოვს გახანგრძლივებულ ან სულაც სადღეღამისო განრიგს. შესაბამისად, კოდექსის მიხედვით სამუშაო კვირის განმავლობაში სამუშაო დროის 41 საათიდან 40 საათამდე შემცირება გამოიწვევს მომსახურების სექტორის კომპანიებისა და მცირე მეწარმეებისათვის დამატებითი თანამშრომლების აყვანის აუცილებლობას, გაზრდის მათ ხარჯებს და ნეგატიურად აისახება ბიზნესის შემდგომ განვითარებაზე"- განმარტავს საერთაშორისო ინვესტიციების საკოორდინაციო ცენტრის ექსპერტ-იურისტი გიორგი გვენეტაძე.
ცენტრის ექსპერტის აზრით, კოდექსის პროექტის გათვალისწინებით დამსაქმებელს იურიდიული თვალსაზრისით სერიოზულ პრობლემებს შეუქმნის შრომითი ურთიერთობის შეწყვეტის ახალი წესი და გაფიცვასთან დაკავშირებული რეგულაციაც.
„კერძოდ, ცვლილებების მიხედვით დამსაქმებელი ვალდებულია არანაკლებ 30 დღით ადრე გააფრთხილოს დასაქმებული გათავისუფლების შესახებ. ამავე დროს დასაქმებულს უფლება აქვს ამავე ვადაში გამოაცხადოს გაფიცვა კანონის სრული დაცვით, რაც გამორიცხავს გაფიცვის დროს მისი გათავისუფლების შესაძლებლობას. შედეგად თეორიულად და პრაქტიკულად შესაძლებელი ხდება დამსაქმებელს განუსაზღვრელი დროით ჰყავდეს შტატში მისთვის ობიექტურად მიუღებელი დასაქმებული, მხოლოდ იმ მიზეზით რომ ვერასოდეს შეძლებს ამ რეჟიმში შრომითი ურთიერთობის შეწყვეტას. ვფიქრობთ, ეს ხარვეზი სასწრაფოდ უნდა გასწორდეს.
გაუმართლებლად და ყოველგვარი დასაბუთების გარეშეა გაზრდილი დროებითი შრომისუუნარობის გამო შრომითი ურთიერთობის შეჩერების ვადა 30-დან 40 დღემდე და ჯამურად 6 თვის განმავლობაში 50-დან 60 დღემდე.
ამ ეტაპზე ნაადრევად და გაუმართლებლად მიგვაჩნია ასევე პროფკავშირების შემოყვანა დამსაქმებელთან შრომითი ურთიერთობის სუბიექტად, რადგან საკმაოდ ბუნდოვანია თავად ქართული პროფკავშირების დღევანდელი სამართლებრივი სტატუსი, მათი დაფინანსების წყაროები და რეალური მიზნები.
ამდენად, ვფიქრობთ, რომ შრომის ახალი კოდექსი შეაფერხებს ინვესტიციებს, არ შეუწყობს ხელს ახალი სამუშაო ადგილების შექმნას და შეამცირებს დასაქმებას.
მთლიანობაში იმდენად გართულებულია დასაქმებულის სამსახურიდან გათავისუფლება, რომ დამსაქმებელიც ბუნებრივად ეცდება წინასწარ დაიზღვიოს თავი და დიდი სიფრთხილით მოეკიდოს ახალი თანამშრომლის აყვანას, რაც გაართულებს ნებისმიერი პროფესიონალი და კეთილსინდისიერი პირისათვის სამუშაო ადგილის მოძებნას"- აცხადებს გიორგი გვენეტაძე.
