სებ-ი და სსფ საქართველოს ეკონომიკური ზრდის პროგნოზს გადახედავენ. როგორც დღეს სებ-ის პრეზიდენტმა გიორგი ქადაგიძემ აღნიშნა, დღეისათვის არსებული მაკროეკონომიკური მონაცემები სებ-ს არ აძლევს იმის თქმის საფუძველს, რომ ქვეყანა წლის ბოლოს 6 %-იან ეკონომიკური ზრდის მაჩვენებელზე გავა.
„საქსტატმა" გამოაქვეყნა 2013 წლის პირველი კვარტლის მონაცემები. ჩვენ ასევე გვაქვს აპრილის წინასწარი მონაცემებიც. სამწუხაროდ ამ მონაცემების ერთობლიობა არ გვაძლევს იმის საშუალებას, რომ ვივარაუდოთ, რომ ჩვენ წლის ბოლოს 6 %-იან ეკონომიკური ზრდის მაჩვენებელზე გავალთ. ამისი მიზეზი ერთის მხრივ არის პირდაპირი უცხოური ინვესტიციების შემოდინების შენელება, ასევე ადგილობრივი ფაქტორი. მხედველობაში მაქვს ადგილობრივი ბიზნესის პასიურობა, რომელიც ჯერ კიდევ არ გამოსულა მოლოდინის რეჟიმიდან"- განაცხადა გიორგი ქადაგიძემ.
როგორც სებ-ის პრეზიდენტმა განმარტა სებ-ი აქტიურად თანამშრომლობს მთავრობასთან და ინფორმაციის გაცვლა ყოველდღიურ რეჟიმში ხდება.
„სებ-ის თანამშრომლობს მთავრობასთან, ყოველდღიურად ვცვლით ინფორმაციას აღნიშნულ მონაცემებთან დაკავშირებით და ვაკეთებთ ინფორმაციის ანალიზს. იმედს ვიტოვებთ, რომ წლის მეორე ნახევრიდან აღნიშნული ნეგატივები და ტენდენცია შეიცვლება"- განაცხადა გიორგი ქადაგიძემ.
ქადაგიძის განმარტებით, რამდენიმე დღეში საქართველოს სსფ-ს მისია ეწვევა და სებ-ი მათთან ერთად გაივლის დღეისათვის არსებულ მაკროეკონომიკურ მონაცემებს და 2013 წლის ეკონომიკური ზრდის პროგნოზს კლების მიმართულებით გადახედავს.
შეგახსენებთ, რომ 2013 წელისთვის მთავრობა 6 %-იან ეკონომიკური ზრდას პროგნოზირებდა, რაც თავის მხრივ სსფ-ს პროგნოზსაც ემყარებოდა.
დაახლოებით ერთი თვის უკან აზიის განვითარების ბანკმა გამოაქვეყნა ანგარიში სადაც აღნიშნული იყო, რომ 2013 წელს საქართველოში მშპ-ს ზრდა სავარაუდოდ, 5.5%-ი იქნება, ხოლო 2014 წელს 6.0%-მდე გაიზრდება,
ანგარიშში ასევე განმარტებული იყო, რომ საქართველოს ეკონომიკა 2012 წელს კვლავ მაღალი ეკონომიკური ზრდის ტემპით გამოირჩეოდა, რაც 6.1%-იან ზრდაში გამოიხატა, თუმცა ეს მაჩვენებელი უფრო ნაკლები იყო ვიდრე 2011 წელს დაფიქსირებული 7.2%.